Covid-19 vanga buai Bayern Munich

Bayern Munich-in zanin dar 1:00 hian Bundesliga inkhelah Augsburg an hmachhawn dawn a, Augsburg Arena-ah Covid-19 positive vangin Julian Nagelsmann-a'n Niklas Sule leh Josip Stanisic te a chhawr thei lo ang.

International break laiin German defender Sule-a'n Covid-19 a kai a, Joshua Kimmich (26), Serge Gnabry (26) leh Jamal Musiala (18) te khung hran an ngaih phah. Augsburg an hmachhawn hunah hian Kimmich, Gnabry leh Musiala te khel thei tawh mah se team hotel-ah an la awm ve thei lo ang.

Germany-ah Covid-19 kai an pun thar avangin Bavaria huamchhungah dan khauh zawk an kalpui a, Covid-19 vaccine la lo tan hotel-ah a thlen ve theih loh. Kimmich hian vaccine a la lo a, chutihrualin Gnabry leh Musiala te hi Sule positive vanga an khung hran ve avangin vaccine an la loah a ngaih theih. A chhan chu vaccine la tawh chu an negative a nih chuan khung hran ve kher a ngai lo.

Augsburg hi Munich aṭanga darkar khat vel lek kal a nih avangin vaccine la lote pawh hi awlsam takin anmahniin an inkhalh thleng thei dawn a, club hruaitute tan erawh hri leng vanga player himna ngaihtuahin lu haina tham a tling thung.

Bayern hian match 11 aṭangin point 28 an hmu a, hmahruaitu an ni mek. Bavarians hi anmahni hnaih bertu Borussia Dortmund aiin point liin an sang zawk a, champion nawn ngei tura ngaih an ni.