Rohit-a captain-na hnuaiah India an chak

Nilaini zan khan Jaipur-ah India-in wicket ngain New Zealand an hneh. T20 World Cup-ah khan Men in Blue hian Black Caps an hneh loh avangin Super 12 an paltlang thei lo a, Rohit Sharma captain hna a chelh hnua an match hmasa berah an hneh thung.

Sawai Mansigh Stadium-ah a vawi khat nan T20 international match khelh a ni a, ṭhumvawra chak India-in vawm hmask an thlang. New Zealand-in over 20-ah 164/6 runs an siam.

Black Caps tan hian Martin Guptill (70) leh Mark Chapman (63) te an che ṭhat zarah target pangngai tak an chhawp chhuak. Indian bowler zingah Bhuvneshwar Kumar-a'n wicket hnih lain 24 runs a pe a, a vawm ṭha ber.

Rohit-a hoin mualneituin bul an ṭan ṭha a, India captain hian 36 balls-ah 48 runs an siam. Pathumnaa rawn lut Suryakumar Yadav-a'n India ball 40 lekah 62 runs siamin India chu dinhmun ṭhaah a rawn dah a, hnehna chan erawh a awlsam phah lo.

Over tawp berah India-in chak turin 10 runs an la mamawh a, Venkatesh Iyer-a'n four a vuak hnuah dressing room pan a ṭul a, a tawpa hnehna chanpuitu chu Rishabh Pant a ni. India wicketkeeper Pant-a'n ball hnih a la awmin four runs a vua a, Men in Blue-in 166/5 runs siamin hnehna an chang.

India leh New Zealand hian zanin dar 7:00 hian Ranchi-ah match hnihna an khel leh ang. Series hi match thum khelh tur a ni a, November 21, Pathianniah T20 match tawp ber hi khelh tur a ni.