Salah leh Mane ten min pui - Williams

Liverpool right back Neco Williams chuan nitina Mohamed Salah leh Sadio Mane te nena an training ho avanga hma a sawn phah thu a sawi.

Kum 20 mi Williams chuan, "Contract ka ziah a, ka rilrua awm hmasa ber chu hma ka sawn tur a ni. Mo Salah leh Sadio Mane te nen nitinin kan training ho a, chu chuan player ṭha zawkah min siam.

"Inkhelh hma ni hnuhnung berah hian 11 vs 11 hi kan khel ṭhin a, starting XI leh player dang kan inhmachhawn ṭhin. Salah leh Mane te hi chuan bul an ṭan deuh ziah a, hma ka sawn phah a, nuam ka ti bawk," tiin a sawi.

Liverpool academy chhuak Neco Williams hian Trent Alexander Arnold vangin khelhna hmun a chang tam lo a, tun season-ah league match vawi khat chiah a la inlan. Chutihrualin Williams hi kum 20 mi chauh ni chungin Wales tan vawi 17 a khel tawh a, goal hnih a khung tawh.

Jurgen Klopp-a hote hian November 20, Inrinni zan dar 11:00 hian Anfield-ah tun hnaia che ṭha tak Arsenal an mikhual ang.