A thiam pariat zingah Sindhu

PV Sindhu chuan nimin khan Indonesia Masters Super 750 badminton tournament-ah quarterfinal a in vaw kai. Indian shuttler hian world no 47 Clara Azurmendi chu 17-21, 21-7, 21-12 in a hneh.

World champion pawh ni tawh Sindhu hian Tokyo 2020 hnuah inelna a la hmachhawn leh mumal lo. Tun ṭumah pawh hian beisei anga ṭhain a khel chhuak nghal lem lo, mahse minute 47 an inkhelh hnuah a vannei zawk.

Olympic medal vawi hnih dawng tawh Sindhu hian a match lehpekah chuan world number 30 Neslihan Yigit a hmachhawn dawn. Turkish nula nen vawi thum an intawn tawhnaah Sindhu hi a chak vek, tun ṭumah pawh hian rinkai zawk a ni ang.

Inkhel dangah rawlthar Lakshya Sen chu mipa singles huangah a chak lo a, mixed doubles pair Dhruv Kapila leh N Sikki Reddy te pawh an khingpui hneh loin an zinkawng a tawp ve bawk.