Federer a chawl rei dawn

Roger Federer-a'n season thar bul a ṭan thei dawn lo tih a chiang tawh, tuna thu thar berah chuan Wimbledon a khel thei lo mai thei, tih a ni leh ta - Swiss star hian a duh aia hmain tennis a chawlhsan lo ang tih a sawi theih ta lo.

Kum 40 mi Federer hi Wimbledon 2021 khan a inhliam, a khup na vangin tun thlengin a la inkhel leh thei rih lo. Hmanni lawk khan Australian Open 2022 a khelh theih loh tur thu sawi a lo ni tawh.

Grand Slam vawi 20 champion tawh Federer chuan, "Wimbledon ka khel thei lo a nih chuan a hrehawm khawp ang. Tuna ka beisei dan chuan January thla hi chuan training zângkhai zawk ka neih theih tawh a rinawm.

"Nakkum March emaw April emaw hi chuan tennis court-ah ka inlan theih kan beisei, mahse hengte hi tunah chuan beiseina mai a ni rih. Tennis hi ka nun a ni a, hei vang hian ka theihna zawng zawng ka hlan ṭhin, lo kir leh theih chu ka beisei," tiin a sawi.

Federer hi Rafael Nadal leh Novak Djokovic ten nen major title lak hnem lamah an intluk mek, nomawi 20 ṭheuh an chawi tawh. A tu emaw ber hi chuan season tharah record an siam ngei a rinawm.