Tennis Roreltu Roger hun a liam em ni?
Ṭhian duhtakte u,
"In awm hnunah hlim leh hrisel taka in awm ka beisei. Ka khup na vangin kei pawh ka in enkawl chhunzawm reng a, hmasawn zel tura ka inngaih laiin hun rei zawk enkawl a ngaih hmel ta.
Kum 2017 season kha thui takin ka lo thlir lawk tawh a, a hma kumah ka chawlh hma phah a nih kha - khatiang
bawk khan 100%-in ka inkhelh leh theih nan ka chawlh rei a ngai dawn a, nakkumah ṭha taka ka inkhelh theih nan ka chawlh rih a ngai.
Tennis leh min ṭantute ka ngai dawn hle mai che u, mahse kan ṭhat tlan nan tun season chu hma takah ka mangṭha a ngai, " - Roger Federer
Tun season chhung Roger Federer a inkhel kan hmu dawn tawh lo a, tennis roreltu ropui hi kumin chauh ni loin inelna huangah kan hmu nawn leh ngei ang em tih chu zawhna lian tak a ni ta - a chhanna chu season thar lama hriat tur a ni ang.
Kum 38 mi a ni tawh a, August 8 hian kum 39 a tling ang; season thar a her chhuah meuh chuan kum 40 mi a ni tawh dawn tihna a ni. Federer hi a kum rualpuite chuan tennis khelh an chawlhsan tawh, a ropuina hmuna kir leh tur chuan a awlsam dawn lo.
Grand Slam vawi 20 champion tawh hian tun kar tir lam khan a khup hliam vangin tun season chhung a inkhelh tawh loh tur thu a sawi chiang, tun hma lama a tih tawh angin kuminah chawl hma mah se season tharah
ṭha taka khelh a la beisei thu a sawi tel bawk.
Harsatna
Khup na, hnungzângna leh kiu hliam vangin Roger Federer hi a buai ve fo a, 2017 pawh khan thla ruk zet hliam vanga a chawlh hnuah Australian Open a khel leh thei chauh a, ropui takin a champion zui nghal; hemi kum hian a vawi riat nan Wimbledon title a la bawk.
Hliam leh harsatna lian tham lutuk nei loin a inkhel zui zel. Season hmasa khan Wimbledon final khelin, inkhel ropui takah Novak Djokovic a ngam lo. Nomawi chawi chiah lo mah se kum upa tak chunga a la khelh ṭhat theih em avangin chanchin lawmawm a ni.
January thla khan Australian Open 2020 khelh a ni a, Swiss star Roger hi a inlan. Mahse vanduai thlak takin a khup a hliam a, zai a ngaih bakah enkawl chhung a rei avangin tun thlengin a la inkhel thei ta lo.
Hma taka season a ti tawp hi amah ṭantute tan chanchin hriat nuam lo a ni a, tennis ngainatu tan pawh channa lian tak a ni. Amaherawhchu, tun hma pawhin Federer hian hun harsa leh khirhkhan a lo paltlang fo tawh, beiseina nen a rawn kir leh hun chu a fan-te nghakhlel takin an thlir.
Hripui a leng
Khup hliam vangin Federer a inkhel thei lo a, a beisei dan chuan July thla a khelh tur Wimbledon-ah kir theih a inring - clay court seaason chhung tun hma lama a tih tawh dan ang thoin hman loh a pawi ti lo.
Lungngai taka a indawm kun laiin Covid-19 a leng a, hripui vang hian March thla tir lam aṭang khan tennis inelna zawng zawng chu chawlhlailawk vek a ni. Inkhel thei loa awm mek Federer tan chanchin lawmawm a ni, world ranking a danglam lo leh zel bawk.
Tennis inelna an neih leh hunah an ranking pangngai an chawm theih dawn avangin Federer tan chanchin ṭha a ni a, hliam vanga a inkhelh theih loh chhungin player dang pawh hri leng vangin an inkhel thei bik lo.
Mahse, world number 4 Federer tan lawm reng theih a ni lo. A hliam a dam hleithei lo a, kuminah player dangin tennis an khel leh a nih pawhin a hmel kan hmu dawn tawh lo a, inelna an hmachhawn tam phei chuan season tharah ranking hniam tak chunga a inlan a ngai dawn.
Record a him lo?
Season kal laiah US Open leh French Open khelh hmabak a la awm, inelna lian pahnih a champion lai Rafael Nadal chu tun dinhmunah harsatna nei loin a inkhel thei mek; hri leng vang erawh chuan Spanish tlangval hi a la inkhel châk rih bik lo thung.
Federer-a'n Grand Slam nomawi 20 a kawl mek a, amah hnaih bertu Nadal-a'n tun dinhmuna US leh French Open nomawi a kawl lai a humhim thei a nih chuan kuminah record ropui hi a khum fel der dawn tihna a ni.
Nadal chauh a ni lo, major title vawi 17 la tawh Novak Djokovic pawh sawi hmaih theih a ni lo. Serbian star hi kumina chak loh la nei lo a ni a, inelna lian an hmabak pahnihah pawh hian champion tura rinkai a ni - Nadal tan a awlsam bik lo ang.
Dominic Thiem, Stefanos Tsitsipas leh Alexander Zverev ten Grand Slam nomawi la chawi chiah lo mah se elpui hautak an tling. Season hman hmabak la awm hi Nadal leh Djokovic inelna chauh ni loin player dang tan pawh kawng a inhawng zau viaua ngaih a ni.