Tennis khelh dan phung

Roger Federer chu na taka khingpuite nawr chi a ni a, mahni inven ai chuan tumpuite nawr chiai mai chi a ni. 'Attacking Game' ngainatu a ni a, point khat hmu tura rei tak beih ai chuan a awlsam thei ang bera hmuh nghal a duh ṭhin.

Service na hmingthang John Isner leh Ivo Karlovic te ang em chu ni lo mah se a service chu player dang tana hmachhawn châkawm loh tak a ni. A service hmasa ber a fuh a nih chuan a tlangpui thuin a tawlh hma a, ball rawn let chu fim taka ngaihtuah chungin a lo vaw let ṭhin a ni.

Forehand nei ṭha bik a ni a, khingpuite tana lak harsa tura ball vuak vir leh court sir tak taka vuak let a thiam hle. Net bul hnai takah, lakphak loh tur sia ball vuak tlak a thiam a, a ṭul hunah chuan na leh kawk takin a hlap chhuak thiam bawk.

Player dangte aia Federer inkhel hmuhnawmna pakhat chu 'backhand' a nei ṭha hi a ni. Harsa taka vuak let hram tura ngaih pawh kut khingkhat chauh hmangin nawm hmel angreng takin a backhand let mai ṭhin, a hmanraw ṭha leh pawimawh zinga mi a ni.

Backhand a thiam em avangin a hmingthang a, amaherawhchu a chak lohna thuruk a ni ve thung si. A bik takin ban vei lam hmang thiam Rafael Nadal nen an inhmachhawn ṭuma point a hlohna tam tak chu a backhand a ni - Nadal-a'n hmazawnga na taka a vuak kha Federer tan vuak let a harsa ṭhin.

Attacking game bikah chuan Federer hi tunah pawh khawvela a ṭha ber zinga mi a la ni reng, tun hnaiah erawh a defensive lam a tlahniam. Mihring famkim a awm theih loh ang bawkin tennis player pawh an famkim lo; Roger Federer erawhin tennis khel tura thiam ngai leh neih tur a nei kim hle.