Tunisia nuaitu HurriKANE thlipui!

Harry Kane-a'n 2014-15 season-a goal 31 ngawt a khung ṭum khan a khelh dan ngaina lotu ten 'One season wonder' tiin an sel a, tunah erawh amah ringhleltute chalah chil a hnawm nawn leh ta!

World Cup 2018 a her chhuah meuh chuan Kane-a ṭhatzia inhrilh nawn kan ngai tawh lo a, khawvela ennawm ropui ber tia an chhal FIFA World Cup-ah meuh pawh a danglam lo–Thawhṭanni zan khan England chuan 2-1 in Tunisia an hneh a, Three Lions goal hnih hi Harry Kane-a khung a ni.

Tunisia-in HurriKANE thlipui dan tum teh mah se an ṭang tlang zo lo. England hian Kane hmanga goal hmahruai an khung hnuah Tunisia-in Ferjani Sassi penalty hmangin an chhanglet a, Kane bawk hian hun pek belhah chakna goal a khung.

Three Lions chu
Volgograd khawpuia inkhelah England coach Gareth Southgate-a'n rinlawk ang ngeiin 3-4-3 formation a rawn hmang a, inkhel ṭantir phat aṭangin sakeibaknei tha za ang maiin Three Lions an hmuhnawm.

England tlarhma ten vawi tam Tunisia keeper Mouez Hassen min hmelhriattir hnuah goal hmahruai an khung ta nge nge – John Stones-a ball tauh chu kum 23 mi goalkeeper hian dang hman mah se a let lehlam chu Kane-a'n goal-ah a chantir ta tho.

Three Lions fan-te hlimin an lam a, an khelh dan en phei chuan goal an la khung dawn chauh niin a lang–beisei ang ngawt erawhin thil a kal lo. Minute 35-naah Kyle Walker-a'n Tunisia forward Fakhreddine Ben Youssef a nghawk nia a lan avangin African team-in penalty an hlawh chhuak a, Sassi chuan goal-ah a chantir.

Chawlhlawk hman a nih hnuah Tunisia an ziaawm sawt a, England-in goal nawr an bansan tihna erawh a ni lo. Point insemin team pahnih an ṭin mai dawn niin a lang hman a, mahse Kane chuan hun pek belhah Harry Maguire ball tauh phei chu lo tauh chhawng ve lehin Tunisia goal-ah a lut a, England an chak.

Wrestling leh football!

Tunisia penalty hlawhchhuah kha thlirlet chuan Walker-a'n tihsual a nei niin a lang lo a, Ben Youssef a 'nghawk' nia lang kha penalty pekna tur chuan a nem hle.

Hetihlai hian England-in lawm lohna tur dang an neih chu Tunisia laka referee mit a 'del' tlat kha a ni. Kane chu penalty area-ah vawi hnih ngawt buan thluk a ni a, mahse referee-in penalty a pe leh tlat si lo–kha tak kha video assistant referee-in sawisel a hlawhna pakhat a ni.

VAR hi thutlukna dik lo a awma siamrem tura beisei a ni a, England penalty beisei pahniha 'review' koh a ni lo khan mak tih a hlawh a, he VAR hmangtute hi 'mihring' tho an nih miau avangin a fel tawk lo hi chu a awm reng dawn tho niin a lang.

England boss Gareth Southgate chuan, "Walker vanga penalty kan chawi a nih chuan penalty hmuh phuna kan nei ve bawk a ni," tiin referee thutlukna a lai tawk loh thu a sawi.

Beisei phak lo Sterling
Premier League-a Manchester City champion puitu Raheem Sterling-a'n ram tan beisei a phak lo chhunzawm zel a, Liverpool forward hlui hian England-a a hmun chan chhunzawm zel a duh chuan insiamṭhat a mamawh.

Sterling hian England tana a match hnuhnung 21-ah goal a khung tawh lo a, Tunisia lakah a record duhawm lo thaichhe turin hun ṭha pek ni mah se chance duhawm a neih goal-ah a chantir thei lo bawk–minute 68-naah Marcus Rashford chuan a thlak.

Player a nih laia tlarhnunga khel ṭhin Gareth Southgate-a'n a tlarhnung pawp a hmuh hmaihin a rinawm loh a, an khelh

ṭhat zanah pawh Tunisia tan 'hlauhawmna' chance an siam–an insiamṭha lo a nih chuan tlarhma nei ṭha Belgium lakah chuan an him lo tawp ang!

England tana thu lawmawm erawh tlar hmaah chance vawi tam an insiam thei – Kane-a'n goal hnih a khung bakah Dele Alli leh Jesse Lingard ten woodwork an tih per a, Jordan Henderson a shot ṭha tak chu dan sak a ni bawk.