Colombia hliamtu Samurai Blue

Asia khawmualpui beiseina chhi nung turin Japan chuan nizan khan Colombia 2-1 in an hneh a, last 16 luh beiseina sang tak nen World Cup bul an ṭan.

Minute thumna lekah goal tur a dan avangin Colombia defensive midfielder Carlos Sanchez hnawhchhuah a ni a, minute tluanin Japan an chungnun phah.

Japan tan Shinji Kagawa chuan penalty aṭangin goal hmahruai a khung a, Colombia-in Juan Fernando Quintero freekick hmangin chhanglet mah se Yuya Osako chuan Japan tan chakna goal a khung.

Red card leh goal

Japan-in goal khung tumin inkhel ṭantir aṭangin an nawr nghal a, minute thumna lekah an beisei an hmu nghal. Shinji Kagawa pet goal tur nia lang chu Espanyol defensive midfielder Carlos Sanchez chuan a kutin a lo dang a, referee chuan tih luihah ngaiin Sanchez hi red card a pe a, penalty spot a kawk zui.

Player tawnhriat ngah Kagawa a lo pen chhuak a, Borussia Dortmund midfielder hian harsatna nei loin Arsenal goalkeeper David Ospina venah a pet lut. Colombia an hawihai a, an goal khung lawmin Japan an lam.

Huaisen takin...

Colombia-in 4-2-3-1 formation-in inkhel bul ṭan mah se holding midfielder pakhat Sanchez hnawhchhuah a nih avangin 4-4-1 ah an inthlak a, tlem zawka khel ni mah se tlawm an tum lo - Radamel Falcao hoin chance hlauhawm an nei leh ṭhin.

South American team hian minute 39-naah an si phurh an sut. Juan Quintero chuan freekick aṭangin lei hrulah a pet phei a, Japanese goalkeeper Eiji Kawashima-a'n a man hman angin lang mah se goal line technology a awm tawh miau avangin a goal tih chiang takin a lang.

Chak tumna nen...

Colombia coach José Pékerman-a'n kim lo zawk ni mah se chak duhna thinlung a pu a, hliam vanga inkhel bul a ṭantir ngam loh James Rodriguez luhtirin goal khungtu Quintero a la chhuak.

Mahse, player tam zawka khel Japan-in an nawr chhunzawm a, Bundesliga club FC Koln forward Yuya Osaka-a hlauhawm thei hle - minute 73-naah an goal hnihna a khung. Ṭum dang World Cup aia Japan squad chhahna a lang chhuak a, bench aṭanga luhtir Keisuke Honda corner ṭha zet chu Osako hian a tauh lut.

Beiseina thamral

Colombia tan goal khung tura luhtir James Rodriguez-a'n hun ṭha vawi khat nei mah se Osaka chuan a ke hmangin ṭha zetin a lo dan sak hman a, Colombia substitution aiin Japan substitution a fuh zawk.

Kagawa thlaktu Keisuke Honda-a'n a khel ṭha takzet a, a corner pet kha set piece pet thiam tia hriat lar a nih chhan pholanna pakhat a ni. AC Milan midfielder hlui hi World Cup-a Japan goal khung hnuhnung pariata goal rukah a inrawlh - goal thum a khung a, assist vawi thum a nei bawk.