Belgium tan goal thum leh point thum
Champion rinkai zinga mi Belgium-in FIFAWorld Cup vawi khat khelhna Panama chu Thawhṭan zan khan 3-0 in an sawp. Fisht Olympic Stadium, Sochi-a inkhelah first half-ah goal a lut lo a, second half-ah Dries Mertens-a'n goal ropui khungin Romelu Lukaku-a'n goal hnih a khung belh.
Red Devils hian Inrinni tlai dar 5:30-ah Tunisia an hmachhawn ang a, Panama-in boruak nei lian England nen Pathianni tlai dar 5:30-ah an inkhel ve bawk ang. Group G-ah tlang tura rinkai pahnih Belgium leh Three Lions ten match hmasa berah hnehna an chang ve ve a, an khelh tawh chin aṭanga a lan dan chuan June 26-ah ram pahnih hian group hmahruaitu tur an zawng ang.
Hriat ṭhan Belgium
Spanish coach Roberto Martinez-a'n Belgium a enkawl hmain Swansea City, Wigan Athletic leh Everton te a enkawl a, mi thar a ni tawh lo.
Martinez hian starting eleven-ah pawh British club tana khel player pasarih ngawt a luhtir nghal a; Thibaut Courtois, Toby Alderweireld, Jan Vertonghen, Kevin De Bruyne, Romelu Lukaku leh Eden Hazard te chu Premeir League lama hming langsar an ni a, Vincent Kompany inhliam vanga lut Dedryck Boyata pawh Manchester City player hlui niin Scottish club Celtic tana khel lai a ni.
Player pali dang te chu Napoli forward Mertens, PSG wing back Thomas Meunier, Chinese club tana khel midfielder Axel Witsel (Tianjin Quanjian) leh wing back Yannick Carrasco (Dalian Yifang FC) te an ni hlawm.
Hriat ngai loh Panama
Panama-in a vawi khat nan World Cup an khel a, hming langsar an kawl lo. Nikum October thlaa WC khel tura an tlin chiah khan ram pum chawlh an puang nghal a, tun ṭuma an player lar ber pawh Roman Torres a ni a. Seattle Sounders FC defender hi a thiam ber vang ni loin Russia rama inlan zinga rit ber (99 kg) a nih avangin hriat a hlawh thung.
Canal Men captain Torres hi national anthem sak laiin a mittui a tla a, he mittui hian Panama tana World Cup khelh hlut zia a sawifiah. Coach Hernan Dario Gomez-a'n tlarhnungah defender panga a rem a, halfway line an pelh phak chuan Panama ṭantute an lawm tawk em em.
First half-ah goalkeeper Jaime Penedo a khel ṭha a; Belgium tana Carrasco, Mertens, Hazard leh Lukaku te khung tur a dang. Ram lian Brazil leh Argentina te match hmasa berah an chak zo lo a, champion lai Germany an chak loh bawk avangin Martinez hote tan awm nawmna chi a ni tawh lo.
A thiam an dang
Second half ṭan aṭanga minute hnihna lekah Panama-in an clear mai thei lo a, Napoli forward chuan mawi zetin a volley lut a, keeper Penedo a che hman lo. City midfielder De Bruyne chuan freekick khung lo mah se a hnu lawkah ke ding pawn lam hmangin a ṭhuai lut a, Lukaku-a'n dive chungin a tauh lut a, minute 69-naah 2-0 a ni tawh.
Minute ruk hnuah Eden Hazard-a ball fing um luttu Lukaku chuan keeper Penedo tlan chhuak hmuin a awl laiah thawlh lut a, Belgium goal thumna a khung. Red Devils hian WC group match hnuhnung match 10-ah chak loh an tawng lo a, vawi nga an chak bawk. Panama erawhin team ṭha laka goal venhim an tum miau avangin yellow card panga ngawt an hmu a, anni aia match khata card hmu tam ber chu Netherlands niin 2010 final khan yellow card pasarih an hmu.
Lawm leh lawm
Belgium coach Roberto Martinez chuan, "Bul kan ṭan ṭha a, amaherawhchu Panama tlarhnung kha a phui em em a ni. Dries Mertens-a goal ropui khan thawkna hun min siam sak a, khami zawh kha chuan ngaih ngam takin kan khel thei tawh. Panama kha an thawk rim em em a, minute 45 chuang min dang thei a, ka player-te pawh minute 90 chhung ṭha taka an khelh theih avangin point thum hi an thawhrim rah a ni," tiin a sawi.
Panama coach Hernan Dario Gomez chuan, "Goal tam zawk chu khung belh se chuan a mualphothlak ang. Tumahin chak loh an duh lo a, amaehrawhchu kan khingpui thlirin keini tan chuan result chhia a ni lo a, goal tam zawk an khung thei tlat. European player angin kan ṭha lo a, inzir chawp zel tur kan nih avangin kan zahawmna humhim turin ka hrilh. Mi tam takin goal sarih chuang kan chhuah an ring a, kan thlentir bik lo," tiin an khelh danah lawmna tur a awm thu a sawi.
Yellow card panga chungchang sawiin Gomez chuan, "Tum kan nei a, chutihrualin kan khingpuite an chak a, an thiam bawk. Rilru thianghlim takin kan khel a, kan khingpuite tih nat kan tum lo a, keini aia an ṭhat zawk avagnin card chawi a awl a ni," tiin a insawifiah.