Mit fûkna Ronaldo leh De Gea

Vawiinah group B inlan hun a thleng leh ta. Portugal-in Luzhniki Stadium-ah tlai dar 5:30-ah Morocco an hmachhawn dawn a, Spain chu zan dar 11:30-ah point thum la hmu awmchhun Iran nen an inkhel ang.

European champion inlan hmasak bera thil thleng langsar chu Cristiano Ronaldo-a'n hattrick a siam kha a ni a, Portugal captain hi en bik hlawh tur a ni dawn. Manchester United keeper David de Gea erawh La Roja kawr hain World Cup-ah a mualpho a, Ronaldo hattrick siamna remchang a siam sak avangin dem a hlawh a, thlir rawn a ni dawn.

Ennawm tur chu
Morocco hi an point hmuh zat aṭanga teh tur an ni lo a, Iran an hmachhawn ṭumin Aziz Bouhaddouz-a'n injury time-ah pawh minute nganaah an lamah a tilut a, an chak lo. Inkhelah erawh Atlas Lions an chungnung zawk a, chak phu zawk an ni a, 'thih leh dam' inkara an awm tawh avangin Portugal nena an inkhel tur hi en a châkawm hle.

Atlas Lions player tam zawk Europe-a inbeng bel a ni a, wing back atana chhawr Achraf Hakimi chu Real Madrid lama Ronaldo khelhpui a ni a, ani hian twitter-ah inkhelh a châk tawh thu a thai lang.

Spanish club Getafe midfielder Faycal Fajr pawhin, "Iran laka kan result avangin kan lungni lo a, amaherawhchu Portugal laka result ṭha nei turin kan theihnghilh a ngai. Vawi khat chu kan tlawm ta a, beisei tur a la awm. Moroccan mipui inchhuanna turin theihtawp kan chhuah ang," tiin chak tuma an khelh tur thu a sawi a, Ronaldo a fak bawk.

Morocco hian qualifying-ah goal an chhuah lo a, tlarhnung an rem phui thiam avangin Ronaldo tan pawh a awlsam dawn lo. Amaherawhchu kum upat lama ropui lam pan zel Ronaldo hi dan a harsa dawn.

WC-a goal ruk khung tawh Portugal captain hian hattrick a siam nawn thei a nih chuan World Cup history-a match zawna hattrick siam hmasa ber a ni thei a, Portugal legend Eusebio nen World Cup-a goal khung tam ber an ni ang.

Portugal tlarhmaah Andre Silva a awm bawk a, AC Milan forward hi match hmasa berah bench aṭangin a lut. Silva hi Ronaldo nen an inkawp rem viau a, Morocco hmachhawn turin bul a ṭan thei bawk.

Kum 22 mi Silva chuan, "Ronaldo nen kan inmilna chhan chu min mamawh hunah ka awm a, ka mamawh hunah a awm ve bawk. Cristiano hi a tawlh hma a nih pawhin keiin a ven him lam ka ti thei a, kan pahniha kan inkawp chuan midang tan hmunruak kan siam thei a ni," tiin a sawi. Portugal hian point khat chiah an la hmu a, an dinhmun a la ṭhat loh avangin tla thei reng an ni.

De Gea an ring tawk
Spain an ṭha tih lanna chu match hmasa berah European champion Portugal-in an draw a, point khat hlawh chhuak mah se chak lo ang hialin an chhuah. Hei hian WC 2010 champion chunga rinna nasat zia a ti lang.

La Roja an nihna ang lantir lotu chu Manchester United keeper David de Gea a ni a, ani hi khawvel keeper ṭha ber ang hiala chhal ni mah se Spain kawr a hak chuan keeper naran ang chauh a ni. Tun dinhmunah erawh coach Fernando Hierro leh captain Sergio Ramos ten an la chhan a, bench-a a ṭhut hmain a insiamṭhat thuai a ṭul.

Real Madrid captain Ramos chuan, "Tihsual neih lam a ni lo a, tlawm duh ngai loh zawk hi a ni pawimawh. Chet sual ṭum a awm a, chung hunah chuan thawhchhuah leh theih hi a pawimawh. Engtikah pawh De Gea hi ka team-a awm atan ka duh a, ram tan theihtawp kan chhuah dun zel ang," tiin a ziak a, De Gea pawhin, "Captain, ka lawm e," tiin a chhanglet.

Spain hi position tinah an ṭha rual a, an ṭhatna ber chu midfield a tih theih a, tlarhmaa Diego Costa an neih chu inchhuanna tham a tling bawk. Amaherawhchu tun hma angin Andres Iniesta a che rang tawh lo a, Barcelona legend hi khelhna hmun an chang lo a nih pawhin a thlakna tur ṭha an awm. Portugal nena bul ṭan lo Bayern Munich midfielder Thiago Alcantara chu chung zinga mi chu a ni a, squad-a tel pha loah Chelsea midfielder Cesc Fabregas te an la awm cheu.

Player thlirin La Roja an ṭha a, amah­erawh­chu kum 2014 khan first round-ah an tla. Tun ṭuma an khingpui tur Iran hi point thum an hmuh tawh avangin defensive khel thei dinhmunah an ding tawh a, an coach Carlos Queiroz hi tlarhnung rem phui thiam a ni. Portuguese manager hian Real Madrid a enkawl tawh bawk avangin Spain khelh dan a hrechiang bawk ang.

Kum 65 mi Queiroz chuan, "Spain chu goalkeeper aṭanga tlarhma ber thlengin danglamna an thlen thei a, chuvangin kan khelh dan pawh kan thlak ang," tiin a sawi a, point a hlawh leh hrim hrim a nih chuan knockout stage thlen theihna chance a sang a, thahrui an ngah sawt dawn a, inkhel a hmuhhnawm dawn.