Saudi Arabia an him

Russia-a World Cup khela cham mek Saudi Arabia player leh coaching staff te chuanna thlawhtheihna chu a engine lamah felhlel a awm avangin a kang a, Saudi Arabia FA chuan thuchhuah siam nghalin tumah inhliam an awm loh thu an sawi.

Saudi Arabia hian zanin dar 8:30-ah Uruguay chu group match an khelhpui dawn a, an inkhelhna tur hmun Rostov-on-Don an panna lamah an thlawhtheihna hi a kang ta a ni. Saudi thuneitute chuan, "Saudi national team player-te chu him takin an thlenna tur hmunah an awm tawh a ni," an ti.

Green Falcons (Saudi Arabia sawina) hian an match hmasa berah Russia chu 5-0 ngawtin an ngam lo tawh a, zanina an hmachhawn tur Uruguay hi team ṭha tak an nih avangin Asia aṭanga inpet tling team tan hnehna chang tur chuan vanneihna a ngai tel dawn.

Uruguay hian an match hmasa berah Mohamed Salah tel lohna Egypt chu 1-0 in an hneh hram a, Luis Suarez leh Edinson Cavani telna team hi an player neih dan en chuan match hmasa berah beisei an phak lo - zaninah hnehna an chan leh chuan an tan last 16 a chiang deuhthawah a ngaih theih ang. Uruguay hian tun World Cup tih lohah an match hmasa bera hnehna an chan nghalna awmchhun chu kum 1970 daih tawh khan a ni a, semifinal an lut - chhunzawm an tum ang.

Luis Suarez a inlan a nih chuan ram tana a match 100-na tur a ni dawn a, Uruguay tana inlan tam lama pangana dinhmun a hauh zanah goal khung loh a duh dawn lo.