Wolves-ah Portugal keeper

Premier League kai thar Wolves chuan Portugal goalkeeper Rui Patricio chu Sporting Lisbon aṭangin free transfer hmangin an lalut a, kum 30 mi Patricio hian season li daih contract a ziak a ni.

Sporting hian season tharah Champions League an khel phak dawn lo a, May thla khan Aves nen Portuguese Cup final khel tura an inbuatsaih laiin fan-ten player an bei chiam a, training ground an suasam bawk.

Fans chet dan hi Sporting lam chuan an dem thu an sawi, chutihrualin player pasarih chuan kar hmasa khan an contract neih lai an titawp–hei vang hian Patricio pawh hi a thlawna lak theih a ni.

Patricio hian 2016 European Championship-ah an ram Portugal a champion pui tawh a, tunah hian Russia-ah World Cup khelin a thang mek. Goalkeeper tawnhriat nei ṭha leh theihna nei sang lakluh theih hi Wolves tan chanchin ṭha tak a tling ang.

Championship aṭanga inpet kai Wolves hian English football inelna sang berah a ti kimtu nih satliah an tum lo. Patricio an lak hma hian manager Nuno Espirito Santo chuan Mexico forward Raul Jimenez chu Benfica aṭangin loan hmangin a hawh tawh.