Zanin dar 10-ah Bayern Vs Gladbach

Bundesliga-ah champion a hriat hnai. Zanin dar 7:00 hian Borussia Dortmund-in Fortuna Dusseldorf hmachhawn turin Esprit Arena an tlawh ang a, Lucien Favre-a hote hian point an hmu lo a nih chuan Bayern Munich-in Allianz Arena-ah champion an nemnghet thei ang. Hansi Flick-a hote hian zanin dar 10:00 hian Borussia Monchengladbach an mikhual dawn.

Dortmund tan champion beisei ngam chi a ni tawh lo a, an khingpui tur Dusseldorf erawh relegate thei an nih avangin chak tur hriatthiam a har hle. Bayern tan pawh a awlsam dawn lo - Gladbach tan Champions League khel turin point hmuh ngei a ṭul tlat. Flick-a'n a player pawimawh pahnih Robert Lewandowski leh Thomas Muller a chhawr thei dawn lo a, Bayern tan fiahna ṭha tak a ni thei ang.

Borussia Dortmund tana chanchin lawmawm chu captain Marco Reus leh striker Erling Haaland ten training an zawm leh tawh a, chutihrualin Reus hi inkhel bul ṭan nghal tur khawp chuan a la inpeih a rinawm lo. 

Norwegian striker erawhin inkhel bul a ṭan a rinawm. Chutihrualin Lucien Favre-a'n bench-ah a dah a nih chuan tlarhmaah Jadon Sancho leh Thorgan Hazard te nena inthlawp turin Julian Brandt a luh ngei a rinawm.

Fortuna Dusseldorf erawh relegation playoff khel thei dinhmunah an ding mek. Bundesliga-ah a hniam pahnih hi an relegate nghal a, 16-na hian 2. Bundesliga-a pathumna nen playoff an khel ṭhin. Hei chauh hi a ni lo, relegation zone-a awm Werder Bremen tan Dusseldorf hi lehthal theih a nih avangin point hmuh ngei a ṭul a ni.

Bayern Munich leh Dortmund ten Champions League an khelh ngei a rinawm tawh a; RB Leipzig, Borussia Monchengladbach leh Bayer Leverkusen ten hmun ruak pahnih an inchuh a tih theih. RB Leipzig hian nizan khan Hoffenheim an tlawh a, result kan hre hman lo. Chutihrualin result pawh thleng se Gladbach leh Leverkusen tan point hmuh a pawimawh hle.

Leverkusen hian Bundesliga match hnuhnung berah Bayern Munich an hneh lo a, Pathianni zan hian Schalke 04 an hmachhawn dawn. Bavarians hneh loh hnuah Peter Bosz hote hian Saarbrucken hnehin DFB Pokal final an lut a, team boruak pawh a nun viau a rinawm. 

Schalke lakah hian match hnih chhung inlan tawh lo Kai Havertz a rawn let a rinawm a, zanina Bayern-in Gladbach an hneh bawk chuan Leverkusen an phur khawp ang.

Bundesliga-a goal khung hnem ber chu Robert Lewandowksi a ni a, goal 30 a khung tawh. Bayern-a Lewy khelhpui Thomas Muller-a'n assist vawi 20 a nei tawh a, Bundesliga record thar a ni. Statistics aṭanga teh pawhin Lewy leh Muller te ṭangkaizia a hriat nghal a, amaherawhchu hrem vangin an inlan thei dawn lo.

Flick-a hote hi inkhelh ṭan a nih leh hnuah an chak vek a, chu chauh chu ni loin February 9-a RB Leipzig nen an inhnehtawk hnuah inelna hrang hrangah match 12 chhung an chak zawn tawh. Polish striker a awm dawn loh avangin kum 19 mi Joshua Zirkzee a inlan beisei a ni a, Dutch forward hian hmabak a nei êng hle.

Feyenoord leh Bayern aṭanga inzir chhuak Zirkzee hian Bundesliga-ah match sarih khelin goal thum a khung tawh a, Lewy nena khaikhin tur la ni lo mah se 6ft 4in-a sang striker hian Gladbach tan harsatna a siam thei ang. Muller thlakna tur erawh tawnhriat nei ngah player an ther fur a, Thiago Alcantara inhliam vanga bench a luahlum hnuah bul ṭan turin a inpeih tawh ang.

Bayern khingpui tur Gladbach dah hniam a thiang lo a, tlarhmaah Marcus Thuram, Alassane Pléa, Lars Stindl leh Breel Embolo te an kawl. French forward Thuram hian goal 10 a khung tawh a, assist leh goal vawi 10 ve ve nei tawh, a hnampui Plea erawh an match hnuhnung bera SC Freiburg an hneh loh ṭumin hnawhchhuah a ni a, a inlan thei dawn lo.