Anfield-a fiahna hmachhawn tur Arsenal
Tlarhma player hmang chauha Premier League nomawi chawi tur ni se - Liverpool hmatawng aia champion phu an awm kher lo ang. Tlarhnung remphui vang chauha champion theih ni ve thung ta se, tun hnaia Arsenal khelh dan aia hlawhtling tur an awm bik chuang lo.
Hmatawng hriam leh tlarhnung phui ṭha pahnih Reds leh Gunners hi zanin dar 11:00 hian Anfield-ah an intawng dawn. Season bul ṭan chhiat lutuk vanga sawisel hlawh Mikel Arteta naute hian hnehna an chang a nih chuan Jurgen Klopp-a naute chungah an awm thei dawn!
Anfield ngei maia Arsenal chak ṭum kan sawi dawn a nih chuan lehkhabu keu let nasat a ngai, kum kua zet a liam tawh. Steven Gerrard chu Liverpool captain armband hrengtu a la ni, tunah chuan Aston Villa manager a ni tawh - North London club tan result ṭha neih a awlsam lo ang.
Arteta chuan, "Fiahna a ni, Anfield-a inkhelh hi engtik lai pawhin mahni infiahna a ni ṭhin," a ti. Premier League a tlawm lo rei ber ni mek (Pld 8 – chak 6, inhnehtawk 2) Arsenal tan an ṭha tawk em tih chu fiah a ni dawn.
Mane a dam
Roberto Firmino, Naby Keita leh James Milner te hliam vangin an chawl mek a, tun hnaia international match khelhna lamah Jordan Henderson, Sadio Mane leh Andy Robertson ten hliam tenau an tuar bawk.
Hendo, Mane leh Robertson te hian team training zangkhai zawk an nei thei leh tawh thung, manager Klopp-a'n a duh a nih chuan Arsenal hmachhawn turin a thlang thei dawn - Reds ṭantute tan chuan thawk huaina tham a ni ang.
Liverpool manager Klopp chuan, "Sadio khan hliam a tuar ngei a, mahse tunah chuan a ṭha. Team training pangngai a zawm vek thei, midang aiin hahchawlhna hun erawh kan pe hma deuh, a lan dan chuan harsatna a nei tawh lo," a ti.
Firmino erawh hliam vangin a la inlan thei dawn lo. Ani a awm loh chuan Mohamed Salah, Diogo Jota leh Mane ten an inkawp ang. Jota hian season hmasa khan league-ah Arsenal vawi hnih hmachhawnin goal thum a khung, zaninah pawh ven uluk a ngai dawn.
Gabriel & White
Arteta-a'n Arsenal a enkawl tirh lamah khan tlarhnung remphui chu a thupui a, attacking game hmuhnawm khel ṭhin khan inkhel hmuhnawm an chhawp chhuak hlei thei lo - fans lam pawhin an manager hi an sawisel nasa hle a nih kha.
Spanish manager a luhlul tlat a, tunah chuan tlarhnung laiah Gabriel leh Ben White te a inkawp fuhtir tawh a, sawiseltu te ka a hup chiang hle. Arsenal tlarhnungin fak an hlawh, chutih rualin Manchester United laka hattrick siamtu Salah lakah eng ang tak nge an nih chu fiah a ni ang.
Tharum ngah Takehiro Tomiyasu leh Nuno Tavares te hna a hautak dawn, anni pahnih hian Mane leh Salah an hmachhawn dawn a ni. Reds hmatawng hi an tlan chak bakah ball an thiam, an in man bawk avangin dan an harsa - dang thei tur erawh chuan theihna an nei.
Gunners tlarhnung phuina chhan pakhat chu keeper Aaron Ramsdale a ni. English keeper hi a huaisenin a phur vanglai a ni; Watford leh Leicester laka goal chhuah lotu hian Premier League-ah a zawna clean sheet vawi thum neih a tum ang.
Inbeihna tur
Liverpool tlarhma hlauhawm zia sawi nawn a ngai lo, chutih rualin a phena thil awm chhut a ngai. Salah, Mane leh Jota te duh thala an chet theih na tur chuan chawmtu an mamawh, midfielder rinrawl Henderson-a'n Nilaini thleng kha chuan mimal training a la nei.
Brazil tana feh chhuak Fabinho a inpeih a, ball thian Thiago leh Alex Oxlade-Chamberlain te pawhin training an zawm. Midfield hi Klopp tan fimkhur ngaihna tur lai tak niin a lang, khel tam lo leh hliam damhlim ho hi engtin nge a rem dawn tih hriat a châkawm.
Arsenal erawh tun dinhmunah chuan midfield hi an ṭhatna lai tak a ni ve thung. Number 10 Emile Smith Rowe-a'n club tana a khelh ṭhat chu England tan pawh a chhawm zel, tun season a khelh dan thlir chuan Reds lakah a inkiltawih thut kher lo ang tih a rin theih.
Granit Xhaka awm lo mah se Thomas Partey a inlan theih a rinawm tawh, chutih rualin anni pahnih awm loh hlana an hna ṭha taka thawktu Albert Sambi Lokonga emaw Ainsley Maitland-Niles emawin rin nawn an hlawh a nih pawhin a mak hran lo ang.