Lalrina telna India an champion

Mizo tlangval Lalrina Renthlei telna India basketball team chuan 6th SABA Championship-ah an khingpui zawng zawng hnehin chiang takin an champion. Dhaka-a inelna neihah India hian an khingpui Maldives (88-31), Sri Lanka (114-48) leh Bangladesh (106-41) te an sawp vek a, inelna vawi ruk awm tawhah vawi nga an champion.

Nimin khan inelna hi khar a ni a, match hnuhnung berah India-in a thlengtu Bangladesh 106-41 in sawp. Lalrina hian point hnih bakah assist vawi thum leh rebound vawi hnih a nei a ni.

Lalrina chuan, "Pathian remruat vek a ni tih hi ka chiang hle. World Cup qualifier khel turin camp ka zawm a, Covid-19 vangin nakkumah an sawn. SABA-a tel turin min ko a, international gold medal chu kan la ve ta chu nia. Pathian hnenah lawmthu leh ropuina awm rawh se," tiin Vanglaini a hrilh.

Mizo tlangval chuan sawi chhunzawmin, "Ka chanchin min ngaihven a, min thlawptu zawng zawng chungah lawmthu ka sawi. India aiawha ka medal hmasa ber hi hmanni lawka boral ka u Lawma tan ka hlan a, a jersey hak ṭhin number 23 ka ha bawk. Mizo infiammi tan chona thar siamtu ni se. Kan thil tih engah pawh rinawm leh taima taka kan beih chuan thui tak kan thleng thei a ni," tiin a sawi a, amah ṭawiawm tlattu a chhungte chungah lawmthu a sawi bawk.

Tuikhuahtlang tlangval Lalrina hi H. Laldinsanga (Mapuia) dawta India tana khel leh thei hmasa ber a ni a, tualchhung basketball-ah sulhnu a nei ṭha hle. Lalrina hian MSL hnuhnung paliah nomawi a chawi vek a, Zarkawt BCA ṭum thum a champion pui ṭumah MVP-ah thlan a ni vek a ni.