Mizoram hmeichhe team an inpeih

Senior Women's National Football Championship chu November 28 - December 9, 2021 chhung hian Kozhikode, Kerala-ah khelh a ni dawn. Inelna hmachhawn tur Mizoram team pawh an inpeih tawh a, November 21 hian Mizoram an chhuahsan ang.

Mizoram coach F. Lalrozara chuan, "Inpuahchahna kan nei ṭha a, inelna hmachhawn turin kan inpeih. Mizoram tan theihtawp kan chhuah ang," tiin Vanglaini a hrilh. Mizoram team hian October 6 aṭang khan Lammualah residential camp an nei a ni.

Mizoram hi Kerala, Madhya Pradesh leh Uttarakhand te nen an awmho a, November 28, Pathianni hian inelna thlengtu Kerala nen match hmasa ber an khel ang. Hmeichhe team hian MFA thawhpui Nivia kut chhuak jersey an ha ang.