Premier League-ah Steven Gerrard inlan dawn ta

Liverpool legend Steven Gerrard chuan zanin dar 8:30 hian Premier League club Aston Villa coach a nih hnua match hmasa ber a hmachhawn dawn a, Brighton & Hove Albion an mikhual ang.

Gerrard hian Villa-in an coach Dean Smith an ban hnua Aston Villa coach ni tura sawmna chu a pawm a, kum thum leh a chanve chhung atan contract a ziak - tam takin Liverpool coach ni tura inpuahchahnaah an ngaihsak.

Mahse, player a nih laia 'Captain Fantastic' hming lem an pek chuan, "Villa hi club lian zawk enkawlna tura kalkawngah ka ngai lo a, chutiang zawnga ka sawi pawh in la hre lo ang. He club coach ka ni thei hi nuam ka tiin ka inchhuang em em a ni," a ti.

Liverpool fapa
Gerrard hian player a nih laiin Reds tan match 710 khelin goal 186 a khungsak hman a, nomawi liantham pariat chawiin heng zingah hian kum 2005-a ropui taka Champions League nomawi a chawi chu a tel - Liverpool ringawt ngaihtuah anga sawina erawh a pha.

Kum 41 mi coach chuan, "Villa coach ni tur hian ka rilru zawng zawng ka pe a, a hlawhtlinna tur pawhin theihtawp ka chhuah ang. Club tan 100% ka pe ang a, chu chu ka staff-te pawhin an ti ang. Football khawvelah chuan tum leh duhthusam chu kan neih a thiang a, mahse, Liverpool hian world class coach Jurgen Klopp an nei a, an hlim em em a ni," a ti.

Gerrard chuan sawi zawmin, "Klopp hian a dam chhung daih contract pawh ziak dawn ni se, club leh Klopp ka lawmpui em em ang. Pa ṭha tak leh coach ṭha tak a ni a, Liverpool fan ka nih avangin Anfield-a a cham rei poh leh ka lawm ang.

"Klopp-a'n message min rawn thawn a, December 11-ah kan intawn tur thu a sawi a, nghakhlel takin ka thlir a ni," a ti a, Villa coach ni chunga Anfield kir a châk tawh.

Gerrard-a duhna
Villa-in point hnih lekin relegation zone an hlat a, league match 11-ah point 10 an nei a, an league match hnuhnung pangaah an tlawm vek bawk. Gerrard tan siamṭhat tur tam tak a awm tih a lang chiang.

Rangers boss hlui chuan, "A hmaa kan khelh ṭhin dan nena inang lo takin kan khel dawn a, ka rilru puthmang leh ka kalphung pholan ka duh. Hun chu a duh deuh mai thei a, mahse, zanin kan inkhel tur aṭangin danglamna in hmu nghal ang," a ti a, a inringtawk hle.

Gerrard chuan, "Bul ṭan ṭha tur kan ni a, player-te chu an theihna sang ber min hmuh turin ka ti. Stats kan en chuan league-ah goal khung tam pariatna kan ni -forward-ah player ṭha kan nei tih a chiang a, mahse, hei aia ṭha hi a la theih.

"A pawi ber erawh goal kan chhuah hnem lutuk hi a ni a, a pawimawh ber chu kan inven thiam a, tlarhnung kan thuam ṭhat hi a ni. Chu chu kan ti thei a nih chuan hma kan sawn em em ang," a ti a, beiseina a nei sang.

Potter a zam lo
Gerrard-a'n season hmasaah tlawm nei miah loin Scottish Premiership nomawi a chawi a, Rangers-a England captain hlui hnathawh hi engti zawng pawhin sawi nep theih a ni lo - media lam pawhin an fak uar hle.

Mahse, Brighton coach Graham Potter chuan, "Top player-te hian top coach ni turin theihna an nei ṭhin a, chu kawng chu Steven hian a zawh mek a nih hi. Villa hian coach an la ṭha hleah ka ngai.

"Chutihrual chuan Gerrard leh a staff te hi eng anga ṭha pawh ni se Villa-ah hna an la thawk tak tak hman lo a, Rangers-a a kum thum hnathawh ang kha Villa-ah reilotea hmuh chi a ni lo.

"Hetiang chhung lekin danglamna thlen theih a ni lo. Thawnthu hlui sawi chu a theih a, a thleng nawn dawn tihna erawh a ni lo. Kan theihtawp kan chhuah ang a, kan inpeih ang," a ti a, Gerrard chak tir nghal ngawt a tum lo.