Werner-a'n training a zawm

Chelsea striker Timo Werner-a'n khelmual a rah loh reng hnuin Chelsea tan training a zawm leh ta a, German striker hi zanin dar 6:00-a Leicester City hmachhawn turin a dam chiang tawh niin a lang.

Werner hi Malmo nen Champions League-a an inhmachhawn hmasak ṭumin a malpuiah a inhliam a, lakchhuah a ni. Hemi hnua Chelsea match ngaah a inlan leh tawh lo.

International break-ah pawh Germany tan Werner a inlan thei lo a, a hliam dam beiseiin a inenkawl - Ningani khan club training chu pangngai takin a zawm a, zanina a inlan leh lan loh chu Thomas Tuchel-a kutah a awm.

Romelu Lukaku pawhin dam lam pan mah se a ṭhiante erawh a la zawm ve thei chiah lo a, Malmo laka Werner ang thoa inhliam striker hi zaninah a inlan thei dawn lo tih Tuchel chuan nizan khan a sawi. Chelsea hi an striker ṭha pahnih dam loh lai pawhin an buai phah lo. Striker pahnih tel loa match nga an khelhah minute 90 chhungin vawi thum an chak a, vawi khat penalty-a chakin vawi khat erawh Burnley an inhnehtawkpui thung.

Hetihlai hian October thla tawp lama training-naa inhliam midfielder Mateo Kovacic pawh a la inlan thei dawn lo a, Tuchel chuan Croatian midfielder hian inkhel leh tura hun a la duh tur thu a sawi.

German coach Tuchel-a kaihhruai Blues hian tun season-ah league match 11 khelin point 26 an nei mek a, Premier League-ah hmahruaitu an ni - anmahni hnaih bertu Manchester City hian point thumin an thlau mek.

Chelsea hian Thawh-lehni zan dar 1:30-ah Champions League khel turin Juventus an mikhual zui dawn a, last 16 lut tura point khat an la mamawh avangin Thomas Tuchel-a'n Foxes lakah Italian club nena an inkhel tur ngaihtuah chungin player a rem ang.