Djokovic hmachhawn tur Zverev

ATP Finals boruak a sang chho zel a, semifinal khel tur pawh an hriat kim thawkhat tawh. Alexander Zverev chuan Hubert Hurkacz hnehin group stage a paltlang a, semifinal-ah world number 1 Novak Djokovic a hmachhawn chhunzawm leh nghal ang.

Ningani zan inkhelah Zverev hian Hurkacz lakah harsatna a tawk lo, a khingpui hi harsa lo tak 6-2, 6-4 in a hneh. An group aṭangin Daniil Medvedev hnung zuiin semifinal hi a inhlangkai.

Russian star Medvedev hmachhawn tur erawh a la chiang ve lo. Andrey Rublev leh Casper Ruud ten nizan khan group match hnuhnung ber an khel a, a chak zawk hian semifinal-ah champion lai Medvedev hi an hmachhawn ve thung ang.

German tlangval Zverev chuan, "Tun season chhung hian hard court chhunga inelna lian ka hmachhawn ve hian Novak nen kan intawng thei hle, tun ṭuma kan inkhelh tur pawh hi match hautak leh hmuhnawm tak a ni ang," a ti.

Australian Open, US Open leh ATP Cup-ah Djokovic-a'n Zverev hi a hneh. Tokyo Olympic-ah erawh Zverev a chungnung zawk ve thung, 2018 ATP Finals champion a nih theih bawk avangin tun ṭumah pawh hian a zam bik lo ang.

Serbian star Djokovic tan pawh record nih rual turin chetsual a thiang bik lo. A vawi ruk nan a champion a nih chuan ATP Finals nomawi nei hnem ber Roger Federer a nihrual dawn a ni.