Premier League leh NBC inremna a tam

European football-a league ngaihven hlawh ber Premier League chuan American broadcaster lar NBC Universal nen pound tluklehdingawn hnih hu inremna an ziak a, NBC hian kum ruk chhung chu US-a Premier League pekchhuah phalna an nei tihna a ni.

NBC leh Premier League hi kum 2015 khan kum ruk chhung atan vek an lo inrem tawh a, hetihlaia an inremna erawh pound maktaduai 740 a ni a, kumina an inremna thar hian a hliahkhuh chiang hle.

Premier League leh NBC inremna ang chuan NBC hian 2022-23 season aṭanga ṭanin 2027-28 thleng US-a Premier League pekchhuah theihna hi an nei dawn a, he contract hlawh chhuak tur hian CBS leh ESPN nen inel viau mah se a tawpah an ding chang ta a ni.

English top flight league-a chief executive Richard Masters chuan, "Football tan US-ah hun ṭha a inher chhuak a, NBC Sports-in theihtawp an chhuah zarah USA-ah Premier League-in hriat a hlawh tawh hle a ni," a ti.

May thla khan Premier League chuan UK-a an league pe chhuak chhunzawm turin inremna an neihpui sa Sky Sports, BT Sport, Amazon Prime Video leh BBC Sport te chu inremna an neihpui leh a, kum thum chhung atan pound tluklehdingawn 4.7-in inremna hi an pawtsei a ni.