Champion ngei kan tum - Chhara

NorthEast United forward Rochharzela chuan tun season ISL-ah champion ngei an tum thu Vanglaini a hrilh a, zanin dar 7:30-ah NorthEast United hian tun season-a an match hmasa ber atan Bengaluru an lenchilh ang.

Chhara chuan, "Season hmasa khan playoff kan khel a, tun season-ah chuan a aia sang zawk thlen kan duh - chu chu champion a ni. Champion turin squad pawh a chhah ṭha tawk a, player pawh kan thawhhona a ṭha hle," a ti.

Aizawl FC aṭanga hmelhriat hlawh Chhara hian season hmasa khan NorthEast United tan ISL-a a season hmasa ber a khel a, match 12-ah goal khat khungin assist vawi hnih a nei.

Chhara chuan, "Season hmasa ai chuan training pawh kan nei hma a, hma kan sawn nasa. Keima mimalah pawh hliam neih tawh loh ka beisei a, chutiang a nih chuan season hmasa aiin ka khel ṭha ang," tiin Vanglaini a hrilh - season hmasa khan hliamin a tlakbuak avangin beisei ang takin hun a hmang thei lo.

NorthEast United hi ISL-a Indian coach nghet hmasa ber Khalid Jamil hnuaia khel tur an ni a, Chhara bakah hian Lalkhawpuimawia (Mapuia), Laldanmawia Ralte, William Lalnunfela, Joe Zoherliana leh Emanuel Lalchhanchhuaha te chu Highlander-a Mizo player awm mek an ni.

Hetihlai hian Emanuel-a erawh training-naa a khup hliam avangin zai a ni dawn a, tun season chhung chu ISL-ah a hmel kan hmuh a rinawm loh.

Pathianni zan ISL-ah inkhel pakhat a awm dawn bawk a, Mizo player awm lohna East Bengal chuan zan dar 7:30-ah Jamshedpur FC an mikhual ang.

English coach tawnhriat nei ṭha Owen Coyle hnuaia khel Jamshedpur hian defender ṭhiau Mizo player pathum an kawl a, Ricky Lallawmawma, Laldinliana Renthlei leh PC Laldinpuia te chu Men of Steel (Jamshedpur sawina) team-ah hian an khel.