Mizoram cricket team an chak

Board of Control for Cricket in India (BCCI) hnuaia inelna, Men's Under 25 State A Trophy-ah Mizoram team chuan Ningani tlai khan Sikkim chu 58 runs-in an hneh.

Nehru Stadium, Guwahati-a inkhelah Sikkim hi ṭhum vawra vannei zawk niin vawm an thlang. Mizoram tan opener Rohan Chowdhuri chuan 89 runs a siam a, middle order batsman F. Vanlalmuanzuala chuan ball 55 aṭangin 75 runs a siam bawk a. Over 50 chhungin 278 runs an siam.

Tualchhung player hlanga khel Mizoramin an khingpuite run an bituk hnem avangin chak in beiseina a sang a. Sikkim tan Anwesh chuan 93 runs siam mah se over 44.1-ah 220 runs siamin an out vek. Mizoram bowler zingah F. Vanlalmuanzuala chuan wicket li lain, TC Vanlalremruata'n wicket thum a la.

Mizoram hi match hnih an khelh aṭanga vawi khat an chakna a ni a, Nilaini khan Arunachal Pradesh lakah an tlawm tawh a. Inrinni hian Assam nen an match thumna an khel leh ang.

Mizoram team manager Laithanzuala chuan, "250 runs kan pelh chuan chak a beiseiawmah kan ngai a, a tirah wicket hloh nghal mah ila partnership pangngai tak kan nei chho hman zel.

"Middle-order aṭangin kan dinhmun kan siam zel thei a, a tawp lam thlengin batting lamah an thawhhlawk. Vawiina kan chak chhan hi kan ṭanrual vang a ni." tiin an chak hnuah a sawi.

Mizoram hi hmarchhak state dang paruk nen Plate Group-ah an awm.