Xavi - Engin nge club legend hmuak?

Season duhawm lo tak karah Barcelona fan-ten beiseina an nei ve leh ta a, chu an beiseina kengtu chu tu dang ni loin, an player ropui ṭhin Xavi Hernandez a ni. An phurna belhchhah turin club legend Dani Alves a lo kir bawk a, Barca-in an phur vanglai tak an tawng mek.

Barca-in Ronald Koeman an ban rual khan club president Joan Laporta-a'n a tih tur a hai lo. Barca-in bul ṭan ṭhat leh an mamawh tih a hria a, an club kalphung an hloh tawh nia an hriat chu neih let leh a ṭul tih a hria.

Laporta-a'n Xavi lam a hawi vat a, hetihlaia Qatari club Al Sadd enkawltu hi Nou Camp-ah hruaikir dan a ngaihtuah. Club sporting director Mateu Alemany leh vice president Rafa Yuste ten Qatar an pan nghal.

Ni thum zet an cham hnuah Al Sadd chu inremna an neihpui a, tun hnaia leiba ngah ve tak club hian an duh tak an neih theih nan Qatar club hi euro maktaduai nga an pe - zanin dar 1:30-ah Espanyol an hmachhawn nghal dawn a, Xavi fiahna a inṭan dawn e.

Football atchilhtu
Xavi-a'n player a nih laia hlawhtlinna a chhar zawng zawng sawi sen a ni lo a, nomawi chawi theih ang zawng zawng chu a chawi kim a ni ber - football chu simple takin a pholang a, mahse, chutiang ang taka football pholang tur chuan inkhelh thiam chungchuang mi nih a ngai lawi si.

Spanish midfielder ropui ṭhin hian football hi hawisan lai a nei meuh lo a ni ber - a enna tur a awm a nih phawt chuan Bundesliga aṭanga Spain semi-professional league thlengin a thlir peih a, English second division leh Copa Libertadores thlengin a en ṭhin!

Xavi hun pum chu football a ni ber tihna a ni a, Frank Rijkaard leh Pep Guardiola chu coach a ngaihsan ber an ni - Louis van Gaal, Johan Cruyff leh Luis Enrique te chuan football hrethiam lehzual turin an pui niah a ngai a, anni ho hi a dah sang hle bawk.

A tawi zawnga sawi chuan heng coach rualte 'philosophy' hi Xavi-a'n a ngaihsan leh innghah nana a hman a ni a, zanin Barca inkhelah player-ten ball an inpe nasa a nih pawhin mak ti duh suh.

Xavi & football
Al Sadd midfielder Guilherme Torres chuan, "Guardiola nen an ngaihtuahnate a inang a ni ber mai. Ball chan tam a, nuam ti taka kan khelh hi a duh a, mahse, chutah chuan a duhtawk lo. Ball chang tam chunga goal nawr a duh a, thluak hmang chunga fim taka inkhelh a duh.

"Khelmuala player-ten nuam ti taka kan khelh a duh a, a na thei ang bera goal nawr hi a football hriatthiam dan chu a ni. Xavi ropuina chu a inkhelh laia a duh dan ang taka a sawi chhuak thei hi a ni a, chu chu player-te hnena hlanchhawn a thiam em em a ni. Inkhelh thiam tak a nih avangin a tih ang ti tur chuan min beisei hauh lo a, mahse, kan ṭhat dan bera kan khelh theih nan min nawr kal thiam em em a ni," a ti.

Arsenal-a hming lo chher tawh, Xavi hnuaia Al Sadd-a khel Santi Cazorla chuan, "Ball chang tam turin min duh a, a training chu 'rondo' (passing game), ball chan tam leh positional play-ah a innghat a, Barca School dik tak a ni ber e.

"A defending hriatthiam dan chu ball chan reng hi a ni a, chutiang chuan match tin kan khel a, sawisel a thiang lo. Chu chu football a hriatthiam dan leh a tih ṭhin dan a ni," a ti a, Barca inkhel en a châkawm ta hle.

Hmachhawp hautak
Barcelona-in tun hnai season hnih chhungin Copa del Rey nomawi chiah an chawi a, Catalan club dinhmun thlirin a inhmeh lo. Hei chauh a ni lo - an vawk lal len ṭhinna Champions League-ah pawh mualpho khawpin AS Roma, Liverpool leh Bayern Munich an ngam lo a, Barca kha an liam ve taah tam takin an ngai.

Catalan club buaina thukzia hi chanchinbu pheka ziah zawh sen mai chi a ni lo - thla 22 chhungin coach pali an nei hman a, La Liga-ah match 12 an khelhah hnuah pakuana an ni mek bawk. Heng zawng zawng phur chung hian Xavi-a'n Espanyol a hmachhawn dawn a, ni thum hnu lawkah Champions League last 16 lut tura chak ngei ngei mamawh chungin Benfica an hmachhawn leh dawn bawk.

Xavi-a tan tun dinhmunah chuan Espanyol leh Benfica hneh phawt hi hna hmasa a ni a, chumi zawhah hna hautak zual thawh ṭan a ṭul ang. Barca player hmabak nei êng tak tak Ansu Fati (kum 19), Pedri (18), Gavi (17), Nico (19), Eric Garcia (22), Sergino Dest (21), Ronald Araujo (22) leh Oscar Mingueza (22) te club tana rintlak tura chherchhuah chu a kutah a awm.

Hei chauh a ni lo - man to taka an lakluh Philippe Coutinho leh Ousmane Dembele ten an theihna ang taka an khelhchhuah theih nana puih chu a tih tur a ni dawn a, Xavi hian he hna hi a zuam sual ang tih chu hlauhawm tak a ni.

Beiseina
Tun hnaiah club legend ṭhenkhatin an beisei angin hna an thawk lo - Juventus-in Andrea Pirlo rin luih tum viau mah se an ti hleithei lo a, Frank Lampard lah amah siam liantu Chelsea-in mualpho takin a hna aṭangin an ban. Xavi pawh he dinhmun hi tawng ve thei tho a ni.

Mahse, kum 41 mi coach chuan, "Pep leh ex-Real Madrid boss Zinedine Zidane te huangah ka awm hram ka beisei," tiin fiamthuin a sawi a, club legend, mahni club hluia hlawhtling zo ta lote aiin hlawhtlinna tam tak chhartute lam a thlir.

Xavi ropui deuhna chu a inzir reng peih hi a ni - Pep-a'n water polo player hlui Manuel Estiarte hnen aṭanga football tana pawimawh zir tur a zawng ang chiah khan Qatar national handball team coach Valero Rivera chu ṭhian ṭhaah a nei a, football tana a chhawr theih turte a zir ṭhin!

January transfer-a euro maktaduai 10 chiah hman tur nei anga an sawi Xavi hian, "Barca-ah chuan tlawm emaw draw emaw pawh a thiang lo a, chak vek a ngai. He club-ah hi chuan chak ringawt pawh a tawk lo a, mawi taka football pholan tel a ṭul avangin khawvela club enkawl harsa ber a ni," a ti a, zaninah a bul ṭanna khawvelin a thlir ang.