Hremna ka hma-chhawn ka ring lo - Verstappen

Max Verstappen chuan Brazilian Grand Prix an tlan zawh takah tih sual a neih loh thu a sawi a, inelna nuam leh hlimawm a nih avangin hremna hmachhawn tur neia a inhriat loh thu a sawi.

Brazilian GP-ah khan Max-a'n a hnunga awm Lewis Hamilton a dan danah Mercedes an lawm lo, thil thlen dan chu chhui chian an duh thu an sawi hial. Mahse, tun thleng chuan F1 thuneitu lamin thawm an la nei lo thung.

Red Bull driver Ver-stappen chuan, "Hremna ka hmachhawn ka ring lo, a chhan chu inelna felfai tak kan neih vang a ni. Tlankawng sir leh kawng kawi laia tlan sir deuh chang chu a awm lo thei lo, hei chu thil thlen dan pangngai a ni," tiin a sawi.

Dutch tlangval Verstappen hian F1 driver championhsip lamah Hamilton aiin point 14 zetin a hmu hnem mek a, kuminah inelna pathum chauh tlan hmabak an neih tawh avangin nomawi inchuh boruak a sang hle.

November 21, Pathianni zan dar 7:30 hian Losail Circuit-ah Qatar Grand Prix an tlan leh dawn a, driver pahnih Max leh Hamilton hian en bik an hlawh leh ngei ang.