President's Cup Pali chauh an bang ta

Vawiin hian President's Cup 2021 chu semifinal khelh a ni dawn. Cricket Association of Mizoram (CAM) hnuaia inelna neih laiah hian team ṭha pali - Chhinga Veng, Chanmarians, Ramhlun Venglai leh Armed Veng an la dam.

Nimin khan Suaka Cricket Ground, Sihhmuiah quarterfinal khelh zawh a ni. Inkhel hmasa zawkah Ramhlun Venglai chuan Bawngkawn South chu wicket sarihin an hneh a, a hnuhnung zawkah Armed Veng pawhin Lily Veng chu wicket sarih bawkin an hneh.

RVL tan hian Joseph Lalthankhuma'n run 50 a siam bakah Malsawmdinpuia (45 runs) leh R Lalṭhakima (20) te an che ṭha, vawiinah pawh an innghahna tur an ni leh ang. An pathum hian Armed Veng ball vawm thiam Lalsangzela leh H. Lalchhuanawma te lakah fiahna an hmachhawn ang.

Chhinga Veng leh Chanmarians hi inkhel tawk viau tura ngaih a ni. Mahuma Memorial khelh zawh takah pawh khan table hmahruaitu leh pahnihna an ni a, tualchhung player ṭha an kawl khawm hnem avangin inkhel a hmuhnawm dawn.