India-in Sri Lanka-a zin tur ṭhulh

BCCI chuan June leh July thlaa Sri Lanka nen an inkhel tur chu Covid-19 vangin an ṭhulh. India leh Sri Lanka te hian ODI leh T20 match thum ve ve khelh an tum a, amaherawhchu coronavirus vei an pun zel avangin an kalpui ngam ta lo.

BCCI treasurer Arun Dhumal chuan, "June-July thlaa Sri Lanka-a kan zin tur hi a rem ta lo a, Sri Lanka Cricket (SLC) pawh kan hriattir tawh. Team-in training an la ṭan lo a, sorkarin international match khelh a phal dawn em tih a la hriat loh. Chutihrualin inelna kalpui tur hian hun remchang dang kan dap ang," tiin a sawi.

Covid-19 in ziaawm lam a pan a nih chuan August thla hian series hi neih theih beisei a ni.