Leeds United an inringtawk

Leeds United striker Patrick Bamford chuan Covid-19 vangin Championship chawl rih mah se inelna ṭan a nih leh hnuah Premier League an kai ngei a beisei thu 

a sawi.

Championship-ah hian team 24 an awm a, a sang pahnihin Premier League an tlin nghal bakah pathumna leh parukna ten hmun ruak pakhat inchuhin playoff an khel ṭhin bawk. Match kua khelh tur la awmah Leeds hi pakhatnaah an awm a, point 71 hmuin pathumna Fulham aiin point sarihin an sang zawk.

Kum 26 mi Bamford chuan, "Season liam ta kan thlirlet chuan dinhmun ṭha taka kan din hnuah kan chesual a, a uiawm takzet. Championship-ah chuan chet ṭhat reng a ṭul a, a tawp khar ṭhat a pawimawh. Kan tihsual aṭangin kan inzir a, Premier League khel tura kan inpet tlin theih ngei ka ring," tiin a sawi.

Championship hi June 20 hian inelna ṭan leh tum a ni a, Leeds khelh hmabakah hian an elpui Fulham an awm. Marcelo Bielsa hote hian June 27-a Fulham an hneh theih chuan season tharah Premier League an khel ngei ang.