Manchester United : Carrick In; Solskjaer Out

Vincarge Road-ah Man-chester United-in hartharhna an beisei laiin mualneitu Watford lakah 4-1 in an mualpho a, manager Ole Gunnar Solskjaer chungah club thuneitute an dawhthei ta bik lo. Man United chuan Norwegian manager hi an ban a, season tawp thlenga club enkawl lailawk turin Michael Carrick an ruat.

Manchester United hian Thawhlehni zan hian Champions League inkhel pawimawhah Villarreal an hmachhawn dawn a, mahni puala team la enkawl lo kum 40 mi Carrick a hun a inṭan ang.

Mualphona chu
Manchester United hi October 24 khan Liverpool lakah 5-0 in an mualpho a, an hmelma lakah chiang taka an chak loh bakah West Ham leh Aston Villa te an hneh loh tawh avangin Solskjaer hi ban mai tura ngaih a ni.

Coach ṭha bik Antonio Conte te lak theih tura an awm chungin Man United lamin Solskjaer 'chance' an pe leh a, Tottenham 3-0 in an sawp. Spurs-in coach Nuno Espírito Santo banin Conte an la ta zawk.

Man United an che ṭha zui lo a, Atalanta 2-2 in an draw hram. Derby-ah Manchester City chu an mual Old Trafford-ah 2-0 in an hneh a, an chak lohna zat aiin khelmuala an hneh lohna a tam.

International break a awm avangin #OleOut tih thawm a reh a, Watford an hmachhawn hmain insiamremna hun nei mah se an insiamṭha thei lo. Hornets lakah Man United-in khelh ngaihna an hre lo a, 4-1 in an mualpho.

Mualphona vawrtawp
Vincarge Road len luh hmain Man United boss Solskjaer-a'n hmasawn tura theihtawp an chhuah thu leh supporter-ten an duh ang an hmuh tur thu a sawi a, captain Harry Maguire pawhin amah sawiseltute khelmual chhung aṭanga a chhanlet tur thu a sawi.

Mahse, Norwegian sawi letling zawngin vekin a thleng. Watford-in hma takah penalty an hmu a, Ismaila Sarr-a'n a hlah hmasak siamṭhatna hun a nei chungin a pet goal lo.

Man United vanneih hun a inher chhuak turah ngaih theih mah se Solskjaer-a nauten khelh ngaihna an hre lo. Joshua King chuan a inzir chhuahna club lamah minute 28-naah a khung a, Sarr-a'n a penalty hlah thup nan minute 44-naah a pet goal.

Second half-ah substitute Donny van de Beek-a'n Man United beiseina rawn siamin minute 50-naah siphurh a sut ṭhen a, Dutch midfielder hian Cristiano Ronaldo tan chance ṭha siam zui mah se Portugal captain hian keeper chauh a hmachhawn hnuah a pet goal thei lo.

Man United tana harsatna belhchhah turin captain Maguire chuan ama ball chan lai a duh aia thui ti perin laklet a tumnaah yellow card vawi hnih a hmu a, minute 79-naah hnawhchhuah a nih avangin player 10-in an khelh a ṭul phah.

Solskjaer leh a hote mualphona a vawrtawp thlen thlen theih nan injury time-ah Joao Pedro leh Emmanuel Bonaventure ten Watford tan an khung belh a, 4-1 in Ranieri hoten hnehna an chang.

An inṭhen ta
Watford laka an mualpho zawhah Man United board an inhmu khawm nghal a, darkar nga chhung an ṭhut khawm hnuah Ole Gunnar Solskjaer chhawr zui loh an rel. Chutihrualin club legend Solskjaer hi ban anga kaltir loin inhriatthiam tawnna chhuahtir angin an kaltir thung.

Norwegian manager thlakna tur an inrinsiak a, technical director nilai Darren Fletcher chu team enkawl lailawk tura sawi thawm a awm. Amaherawhchu nimin tlai khan Man United hian thuchhuah siamin assistant coach hna chelhtu Michael Carrick chuan season tawp thleng a enkawl tur thu an tarlang.

Engtin zel?
Premier League-ah match 12 an la khel chauh a, FA Cup phei chu an la khel ṭan lo. Champions League-ah group stage khelh zawh a la ni lo a, hmabak a la thui hle.

Carrick hnuaiah Man United hian eng nge an an dawn tih hriat la ni lo mah se club thuneitu lam erawhin manager nghet tur an zawng chhunzawm dawn. Real Madrid manager hlui Zinedine Zidane hming a la ri ring a, Sevilla manager Julen Lopetegui leh Man United defender hlui Laurent Blanc hming pawh an sawi ri.

Season thar an thlir a nih chuan Ajax-a contract nei lai Erik ten Hag pawh an dawr thei ang. Thuchiang erawh Carrick-a hnuaiah Man United an khel tawh dawn a, manager nghet tur erawh an la inrinsiak rih ang.