Arsenal tan Liverpool an la U hret

Tun hnaiah Arsenal khel ṭha tluang viau mah se Liverpool meuh hneh tur chuan an la patuai hret. Inrinni zan Anfield-a Premier League inkhelah Reds hian an mikhual Gunners chu 4-0 in an lo sawp.

Liverpool tan Sadio Mane, Diogo Jota, Mohamed Salah leh substitute Takumi Minamino ten goal khat ṭheuh an khung a, mikhual team Arsenal lamin a chhan letna tur an nei lo a, kut bengin khualmual an chhuahsan.

Boruak a Hot
Inkhelh ṭan hmain Jurgen Klopp chuan, "Arsenal hi team ṭha tak an ni, mahse Anfield a nihna angin kan khel ang," a ti. A thusawi ang ngeiin German manager hian khelmual sir aṭangin boruak a siam, tawnhriat nei tlem zawk Mikel Arteta a chhaih buai hneh hle.

Salah, Alexander-Arnold leh Thiago te goal khung tur chu Arsenal goalkeeper Aaron Ramsdale-a'n a lo dansak vek a, a rim malh malh hle. Chawlhlawk hma deuhin Mane goal khung tur erawh a dang thei ta bik lo; Trent Alexander-Arnold-a free kick chu chiang zetin a tauh lut.

Reds manager Klopp-a'n chawlhlawk laiin a naute hnenah, 'Nawr tawm tâwk rawh u' a ti ni awm tak a ni. Inkhel chawhnu lamah Liverpool hian ball chang tamin na zetin an nawr chhunzawm a, rawlthar rual Gunners an che hman tawh lo.

Nuno Tavares-a ball pek sual dawngtu Jota-a'n Ben White leh keeper Ramsdale a bum phar hnuah an goal hnihna khungin, keeper Alisson aṭanga ball chhuak kal zelah Mane chuan Salah tan an goal thumna a siamsak bawk.

Bench aṭanga a rawn luh aṭanga rei lo teah Minamino pawhin goal a nei, a siamsaktu chu Arnold bawk a ni. English wing-back hian ram tan a match hnuhung berah assist vawi thum a nei a, league lamah vawi hnih a nei chhunzawm lehnghal - dan theih a ni lo.

Arsenal an zuih
Arteta-a'n Anfield-a inkhelh harsat zia a hrechiang a, goal khung ai chuan a venhim hna thawh hmasak a duh. Defenfer ho hmaah damkawr Thomas Partey a dah a, tun hnaia khel ṭha Albert Sambi Lokonga nen a inkawptir.

Kum 22 mi Lokonga hian tihsual a ngah, ho lam taka ball pek chhuah a ngah bakah ball thiam Thiago hmaah a che thei lo. Amah thlaktu Ainsley Maitland-Niles pawhin Watford laka a khelh angin a khel chhuak phak lo hle a ni.

Counter attack chu Arsenal innghahna a ni a, striker Pierre-Emerick Aubameyang leh Bukayo Saka ten remchang chu insiam ve zauh mah se, defender ṭha Virgil van Dijk leh Joel Matip te an paltlang thei lo - Auba shot tawih zet chu Alisson-a'n a lo dang hram.

Inelna hrang hranga match 10 chhung tlawm lo thei Arteta naute khan Klopp leh a hote lakah chuan naupang ang mai an ni a, goal li aia tam an chhuah lo kha an vannei. Anfield-ah khan chak ni se chu Gunners kha table-ah pawh an chungnung zawk ang, mahse a takah chuan team pahnih an la inthlau hle.

Chak lo mah se North London club tan erawh lawmna tur a la awm. Season bul an ṭan chhiat lutuk vanga sawisel hlawh ni mah se table-ah pangana an la ni phak a, an match lehpekah chak la nei lo Newcastle an mikhual dawn avangin insiamṭhat nghal an tum ang.

"Khatianga zirlai zir kha chu ka duh dan a ni lo, mahse inkhel aṭang khan zirlai tam tak kan zir chhuak a ni. Ngun taka inkhel kan thlir kir ang, chutah chuan eng lai nge siamṭhat tur tih ka hre thei dawn a ni.
"Europe khawmualpuia khelmual zingah chuan inkhelh harsatna ber hmun zinga mi a ni a, tihsual neih zeuh kha a pawi ṭhin. Kan khingpui lam khan min rawn hrem letnghal zel mai a ni,"
- Mikel Arteta, Arsenal manager

"A tir lamah duhthusamin khel nghal lo mah ila, chawlhlawk laiin 1-0 in hma kan hruai thei kha a lawmawm hle. Kha aia ṭha zawk pawh khan kan la khel thei a, mahse tuna mi kha a ṭha tawk viau.
"Khelmual sira thil thlengah khan buaina a awm lo, player pahnih ball kang an inchuh a, tumah an intina lo. Arsenal ho hnenah khan eng nge an duh ka va zawt mai a ni. Kei leh player lam khan card kan hmuhna chhan tur pawh awmin ka hre lo,"
- Jurgen Klopp, Liverpool manager