President's Cup ; A hmawr an bawk dawn ta

Vawiin chawhma dar 11:00 hian Suaka Cricket Stadium, Sihhmuiah Chhinga Veng leh Ramhlun Venglai an inkhel dawn, tualchhung criket team ṭha pahnih hian President's Cup 2021 nomawi an inchuh ang.

Cricket Association of Mizoram (CAM) hnuaia inelna President's Cup hi knock out niin, inelna neih laklawh laiin khuain bumro fo mah se a tawpah chuan team ṭha pahnih an tlang ta tho a, inkhel hmuhnawm an chhawpchhuah ngei a rinawm.

Inrinni khan semifinal khelh niin Chhinga Veng hian Mahuma Memorial champion Chanmarians chu wicket sarihin an hneh. 3C tan hian ball 50 a hmachhawn aṭanga run 52 siamtu Vanlalruata Khawlhring leh Lalruatdika (26 runs) te an che ṭha hle.

Ruata leh Ruatdika bakah hian Jonathan Lalrinchhana (13 runs) leh Jonathan Lalbiakkima (12) te pawhin inelna boruak sang an ngam a, final-ah pawh run siam thei player an ngah hi an innghahna tur a ni ang; ball vawm thiam Lalnuntluanga an neih pawh thlamuanna tham a ni.

Tualchhung cricket-in nghet taka zung a kaihna Ramhlun Venglai pawh an chhe lo. RVL hian awlsam taka hneh theih tura ngai Armed Veng chu super over hmangin an hneh hram a, champion an duh a nih chuan batsman lam an ṭan deuh a ngai dawn.

An match hnuhnung pahniha Player of the Match ni thei Joseph Lalthankhuma chungah mawhphurhna a sang leh dawn. Joseph-a hian Armed Veng lakah 25 runs a siam bakah wicket hnih a la thei a, a vuak leh vawm kawngah RVL tan hmahruaitu a nih leh a ngai ang.

Final -Vawiin Inkhel Tur
Chhinga Veng 11:00 AM Ramhlun Venglai

Semifinal - November 20, Inrinni
Ramhlun Venglai (102/10) & (8/0) bt Armed Veng (102/6) & (7/1)
Ramhlun Venglai hi Super Over-ah an chak
Toss: Ramhlun Venglai lamin vuak hmasak an thlang
PoM: Joseph Lalthankhuma, Ramhlun Venglai
Chhinga Veng (116/3) bt Chanmarians (112/7)
Chhinga Veng hi wicket sarihin an chak
Toss: Chhinga Veng lamin vuak hmasak an thlang
PoM: Vanlalruata Khawlhring, Chhinga Veng