Xavi enkawl Barcelona an chak

Barcelona manager thar Xavi Hernandez chuan a match hmasa berah hnehna a chang. Catalan club hian Memphis Depay-a penalty chhuih luh hmangin an mikhual Espanyol chu 1-0 in an hneh a, point thum hlu tak an hlawh chhuak.

Team talbuai Barcelona hian duhthusama ṭhain a la khel chhuak nghal lo. Mahse, Xavi-a'n vanneihna a keng tel a, goal goal chhuah loa point thum an hmuh avangin Catalan club ṭantute an lawm ang.

Inkhel dangah hmahruaitu Sevilla chu Alaves-in 2-2 in an chelh a, champion lai Atletico Madrid erawhin minute 87-naa Felipe goal hmangin Osasuna an hneh a, pakhatna nen an inkarah point hnih chauh a awm. Nizan khan Real Madrid leh Granada an inkhel a, Los Blancos hi an chak a nih chuan hmahruaitu an ni thei ang.

Nou Camp boruak
Lionel Messi chhuah vangin Nou Camp boruak a ngui a, result an neih ṭhat loh chhunzawm avangin Barcelona fans an lungngai thei hle, stadium hmingthang leh nuam takah inkhel entu pawh an thawl ṭhin viau a nih kha.

Club legend Xavi an ko kir a, beiseina thar nan Nou Camp-ah fans an pungkhawm a, inkhelh ṭan hma aṭangin mipui thawm a ṭha tawh hle. Rin loh tak maiin kum 17 mi forward Ilias Akhomach chu inkhel bul ṭantu zingah a telh. Second half-a Illias thlaktu pawh kum 19 mi Abde Ezzalzouli a ni.

Xavi hian Barcelona duhdan a hrechiang a, inkhel thunun tak chungin an khingpui goal an nawr. Ball possession pawh 66% zet an nei thei a, goal khat chauh nei mah se Barcelona khelh dan an lantir miau avangin fans pawh an lawm tih a hriat.

Goal khat a tawk
Hun chanve hma lamah goal a lut lo, second half tir lamah defender Leandro Cabrera chuan Depay a tih tluk avangin penalty a chawi a, Dutch forward hian keeper Diego Lopez bumin goal awmchhun khung nan a hmang.

Nou Camp-ah Barcelona-in chance an nei meuh lo a, amaherawhchu a pawimawh ber goal an khung miau avangin hneh an chang.

Barcelona hian La Liga match 13 aṭanga point 20 hmuin table-ah paruknaah an inrawh chho a, khelh zat inangah hmahruaitu Sevilla an phak loh chu point riat a ni - season chanve pawh an la hman loh avangin nomawi beiseina a la bo lo.

An vannei
Derbi Barceloní a ni miau a, Barcelona an chak awlsam lo hi a mak hran lo. Espanyol lam tan forward Raúl de Tomás a hlauhawm ṭhin hle. Kum 27 mi RDT hian Marc Andre ter Stegen chet ṭhat vangin first half-ah goal a khung lo a, second half-ah goal ban ṭum hnih a tih per leh bawk.

Barcelona vanneihna belhchhah turin substitute Landry Dimata-a'n goal zawnah a tauh lo a, a hnaih tawh em avangin goal zawnah kal se chuan keeper Ter Stegen tan pawh dan ngaihna a awm lo ang.

Xavi a lawm
Kum 41 mi Xavi chuan, "A pumpui thlir chuan ka lawm, chutih rualin hmasawnna lai tur kan la ngah hle. Hmathlir leh hmachhawp pawimawh tak kan nei a, chumi atan chuan tum ṭuma point thum kan hmu thei hi a lawmawm hle.

"Minute 90 kan khelh zinga minute 70 vel bawr chu kan thunun thei, kha kha Barcelona khelh dan tur leh nih phung chu a ni," a ti. Mipui 74,000 chuang pungkhawm chu “Xavi, Xavi” tiin an au ring hle a, manager thar lakah beisei an nei sang.

Barcelona hian Thawhlehni zanah Champions League khel turin Benfica an mikhual zui dawn. Portuguese team hi an hneh thei a nih chuan last 16 an lut dawn; an inkhelhna tur hi Nou Camp a nih avangin mipui thawm a ṭha leh khawp ang.