Messi-a'n Ligue 1 goal a khung ta

Lionel Messi-a'n French Ligue 1 lamah goal hmasa ber khung turin a nghah rei a ngai a, amaherawhchu goal khung thiam bik a nih miau avangin goal nen an inhlat tak tak thei lo - hun tawp dawn hnaiah goal mawi khungin Paris St-Germain chu Nantes lakah 3-1 in hnehna a chanpui.

Inrinni zan Parc des Princes-a inkhelah Kylian Mbappe chuan minute hnihna lekah goal hmahruai a khung a, mualneitu lamin engzat nge an khung belh ang tih chu zawhna a ni a, beisei ang erawhin thil a kal ngawt bik lo.

Goalkeeper Keylor Navas chu Ludovic Blas laka a foul avangin minute 65-naah hnawh chhuah niin, mikhual lamin Randal Kolo Muani hmangin si phurh an sut, mahse Dennis Appiah-a'n anmahni lamah a tih luh palh avangin PSG hi 2-1 in an chungnung.

Paris club hi player kim lo zawk an nih avangin, goal khatin hma hruaitu zawk ni mah se an dinhmun a la him bik lo. Inkhel tawp dawn hnaiah Mbappe ball pek dawngtu Messi chuan thui vak lo a tlanpui hnuah yard 20-a hla aṭangin goal mawi leh chak nemnghehna a khung.

PSG manager Mauricio Pochettino chuan, "Ka nauten hna ṭha taka an thawh avangin ka lawm. A bik takin Leo goal kha a lawmawm, chutih rualin goal a khung theih chhan chu team anga kan khelh ṭhat vang a ni," tiin a sawi.

Barcelona captain hlui hian Champions League lamah chuan Manchester City leh RB Leipzig lakah goal a khung tawh, league bikah chuan PSG a zawm hnuin tun ṭum hi goal a khung lehna hmasa ber a ni.

Ligue 1 hmahruaitu PSG hian Nilaini zanah UCL match an khel zui dawn, Pep Guardiola enkawl Manchester City hmachhawn turin Etihad Stadium-ah an lenglut ang; Group A hmaharuaitu nih inchuhna ang a nih avangin a pawimawh dawn.