Djokovic beiseina ti tawptu Zverev

ATP Finals champion hnem ber nih tum Novak Djokovic chu semifinal-ah a beiseina a thamral. Serbian tlangval hi Alexander Zverev lakah 7-6 (7-4), 4-6, 6-3 in a chak lo a, final thleng zo loin a zinkawng a tawp.

Semifinal inkhel dangah champion lai Medvedev chuan Casper Ruud chu 6-4, 6-2 in a lo hneh ve thung, nizan khan Medvedev leh Zverev ten nomawi an inchuh zui a, result erawh kan hre hman ta lo.

Inrinni zan inkhelah Djokovic leh Zverev te an inbei tawk hle a, chak zawk tur pawh rin thiam a harsa takzet. Boruak san lai takin Zverev a talbuai duh ta bik lo - US Open leh Australian Open lama a ngam loh lakah hnehna a chang ve ta.

Tokyo Olympic champion Zverev chuan, "Novak hneh tur hi chuan taksa leh rilu zawng zawng sen a ngai ṭhin a, a awlsam lo takzet. Ani ka hneh avang hian inrintawkna pawh ka neih belh nasa hle," a ti. Olympic-ah pawh khan semifinal-ah tho Zverev hian a lo hneh tawh.

Chak lo Djokovic erawhin ATP Finals vawi ruk champion tawh Roger Federer a tluk thei dawn ta rih lo, champion hnem ber hi tluk tur chuan nakkum a nghah leh a ngai dawn, player ṭha an rawn chhuah ve zel avangin a awlsam lo ang.

Kum 34 mi Djokovic chuan a hma hun zawhna chhangin, "Engmah ka sawi lawk thei lo, season thar bul ka ṭan dan tur chu nghah rih a ngai, chumi hnuah kan hre chauh ang," tiin a sawi.

January thla aṭangin Australian Open an khel dawn a, tournament director Craig Tiley chuan hripui leng laka invenna (vaccine) la lo chu an inkhelh theih loh tur thu a sawi, champion lai Djokovic hi vaccine la duh lo zinga mi a ni - a hma hun a chiang thei rih lo.