Chelsea an ṭha, an tlo, an chak chiang

Premier League hmahruaitu Chelsea chuan hmahruaina dinhmun sawhnghet turin Inrinni zan khan King Power Stadium an luhchhuah a, 3-0 in mualneitu Leicester City an sawp.

Thomas Tuchel-a hote tan Antonio Rudiger, N'Golo Kante leh substitute Christian Pulisic ten goal khat ṭheuh an khung a, vanneih ṭum ni se goal tam zawk khung thei an ni.

Burnley laka vanduai vanga point khat chauh an hlawhchhuah hnuah Chelsea-in chetsual nawn an tum lo. Ṭan phat aṭangin an goal bawh a na a, Ben Chilwell-a'n crossbar a pet ber mah se minute 14-naah English left back corner pet hi Rudiger-a'n a tauh goal.

Leicester goal khung offside vangin pawm a ni lo a, N'Golo Kante-a'n a club hlui lakah a theihna a lantir. Minute 28-naah Kante hian ṭha zeta a khalh luh hnuah box pawn aṭangin a pet lut. Second half-ah pawh Chelsea chungung mah se keeper Edouard Mendy-a'n hna a nei a, Daniel Amartey ball pet chu ṭha zetin a dang.

Substitute pahnih Pulisic leh Hakim Ziyech ten Foxes tlarhnung an rum ṭhaih a, minute 77-naah goal an sual chhuak - Pulisic-a'n Chelsea goal thumna a khung. A tawp thlengin Tuchel-a hote an hmuhnawm a, offside vangin goal hnih dang pawmsak an ni lo.

Chelsea manager Thomas Tuchel chuan, "International break zawhah cuan a harsa ṭhin a, chutichung chuan kan khel ṭha em em a ni. Tlarhmaah khan hriam ila, kha aia tam kha khung thei kan ni hial. Chutihrualin goal kan venghim ṭha a, kan khelh danah ka lawm," tiin a sawi. Blues hian November 23, Thawhlehni zanah Turin-a an hneh tawh loh Juventus an mikhual ang.