Hnehna nena bul ṭantu Gerrard leh Smith
Steven Gerrard chuan Premier League huangchhungah pawh team enkawl turin a tling tawk tih a pho lang. Gerrard hian Aston Villa a kaihhruaina match hmasa berah 2-0 in Brighton & Hove Albion lakah hnehna a chanpui.
Villa hian an talbuai avangin manager Dean Smith banin Gerrard hi an lalut a, anmahni aia season bul ṭan ṭha zawk Brighton lakah hian Ollie Watkins leh Tyrone Mings te chuan goal khat ve ve an khung.
Brighton hi season bul an ṭhat fuh vanga fak hlawh an ni. Villa erawh nikum lam an phak loh em avangin sawisel hlawh an ni a, tlak mai hlauhthawnawm zinga mi a ni hial, Inrinni zan inkhelah erawh boruak a inthlak thleng hlawk.
Chutihrualin Villa duh loh Smith pawhin a club thar Norwich a chakpui nghal a, Canaries hian Teemu Pukki leh Grant Hanley hmangin Southampton 2-1 in an lehthal. Newcastle United erawh Brentford nen an inhnehtawk a, table mawngphahah an awm.
A tawpah goal hnih
Villa Park-a inkhelah Aston Villa lamin goal nei turin an nghah rei a ngai hle. Hun tawp hma minute ruk chauh awm tawhah Watkins chuan substitute Ashley Young siamsak hmangin goal hmahruai a khung.
Goal khung tur siamsaktu hi minute 74-naa lut a ni a, tawnhriat nei ṭha Young hi chhawr rim tur ni tawh lo mah se a la ṭangkai dawn. Hun tawp hma chiahin Mings chuan chak nennghehna a khung a, goal thumna neih beisei mah se Leon Bailey a vannei zo ta lo.
Villa hi a zawna match nga chhung tlawm tawh an ni a, tuna an chak tak avang hian Premier League table-ah pawh 15-na dinhmun an luah ve leh ta, manager thar Gerrard tan bul ṭan dan duhawm bik a ni ngei ang.
Villa Gerrard
Steven Gerrard hming lam rualin Liverpool hming a ri nghal a, English manager hian Villa zawm hnuah pawh Reds manager Jurgen Klopp thlakna tur anga sawi a la ni tho. Kum 41 mi Gerrard chuan, "Min ringhlel an awm a nih chuan goal khung zawha ka chet dan kha en mai rawh se. Ka nihna ang takin ka lang chhuak," tiin Liverpool Gerrard ni tawh loin Villa Gerrard a nih thu a sawi.
Aston Villa hian Patrick Vieira Crystal Palace, champion lai Manchester City, Leicester City leh Liverpool te an hmachhawn chho dawn a, Gerrard-a'n fiahna a hmachhawn chho dawn.
Newcastle an buai
Newcastle manager thar Eddie Howe chu Covid-19 kai vangin Brentford nena an inkhelh ṭumin technical area-ah a awm thei lo a, Premier League kai thar lakah point khat hlu tak an hlawh chhuak.
St James Park-a inkhelah goal ruk ngawt a lut a, Newcastle tan Allan Saint-Maximin-a'n minute 75-naah goal pawimawh khungin Brentford nen 3-3 in an inhnehtawk. Howe hote hian Liverpool laka mualpho Arsenal an tlawh zui dawn a, hna a harsa dawn.
Newcastle United neitu thar Saudi Arabia Public Investment Fund hausakna hi pound maktaduai 305 a ni a, Premier League club zingah an hausa fal. Amaherawhchu Newcastle hi league-ah table mawngphahah an awm a, manager langsar an lakluh theih loh avangin January thlaa sum an thehchhuak tam lo a nih chuan Premier League-a inhamtang a harsa ang.