Bayern Munich chak lo

Bayern Munich an nih tawh chuan chak zel tura ngaih an ni, a bik takin Bundesliga huangah phei chuan chak char char tura ngaih an ni. Mahse, Zirtawpni zan khan German champion hi team talbuai Augsburg lakah 2-1 in an chak lo.

Tlak hlau Augsburg hian Mads Pedersen leh Andre Hahn te hmangin goal an khung a, chawlhlawk hmain striker ṭha Robert Lewandowski chuan Thomas Muller siamsak hmangin sut mah se, goal dang an khung belh theih loh avangin an tlawm.

Julian Nagelsmann-a naute hi tun season league match bikah chuan vawi hnih an chak lohna a ni a, hmahruaitu la ni tho mah se pahnihna Borussia Dortmund aia an sanna chu point khat chauh a ni, chetsual a thiang tawh bik lo ang.

Bayern coach Nagelsmann chuan, "Augsburg khan an khel ṭha. Bayern manager ka nih hnuah ka naute khelh dana ka lungawi loh nasat ṭum a ni, hmun awl kan insiam hleithei lo, tihsual kan ngah bawk," tiin insiamṭhat an mamawh thu a sawi.

Dortmund hian Inrinni zan khan Donyell Malen leh Marco Reus te goal hmangin an mikhual VfB Stuttgart chu 2-1 in an lo hneh ve thung a, champion lai leh an elpui Bavarians an thlah fal duh bik lo, an hnaihchilh tawh hle.