Mohun Bagan leh Bengaluru te an chak

Tun season Indian Super League match hmasa berah ATK Mohun Bagan-in Kerala Blasters chu 4-2 in an hneh a, Inrinni zan khan Bengaluru-in 4-2 thoin NorthEast United an hneh ve bawk. Zanin dar 7:30 hian East Bengal leh Jamshedpur te an inkhel ang.

Fatorda Stadium-ah ṭan phat aṭangin inkhel a nung. Bagan-in Hugo Boumous hmangin goal hmahruai an khung a, Blasters tan Sahal Abdul Samad-a'n mawi zetin siphurh a sut. Kolkata club-in Roy Krishna penalty, Boumous leh Liston Colaco te hmangin an khung belh a, Colaco goal a mawi hle. Kerala club tan Jorge Pereyra Diaz-a'n minute 69-naah siphurh sut ṭhen mah se scoreline timawitu chauh a ni.

ATK Mohun Bagan-ah Mizo an awm lo a, Blasters-a Mizo awmchhun K. Lalṭhathanga bench-ah a ṭhu tluan. GMC Athletic Stadium-ah NorthEast United tan Laldanmawia Ralte-in inkhel bul a ṭan a, Bengaluru FC-a Mizo awmchhun Edmund Lalrindika chu squad-ah a awm lo.

Team pahnih an inngam tawn a, inkhel an nung ṭha hle. Brazilian forward Cleiton Silva-a'n Bengaluru goal hmahruai a khung a, NorthEast-in Deshorn Brown hmangin an sut ve nghal - goal ṭha ve ve a ni.

Minute 22-naah NorthEast defender Mashoor Shereef-a'n na taka petchhuah a tumnaah chiang takin a pet goal - own goal mak tak a ni. Amaherawhchu Khalid Jamil-a nauten Mathias Coureur hmangin an sut lehnghal. Bengaluru tan Aizawl FC tana khel tawh Jayesh Rane-a'n mintue 42-naah a khung a, second half-ah Prince Ibara-a'n chak nemnghehna goal a khung a, 4-2 in inkhel a tawp.

NorthEast tan hian bench aṭangin Rochharzela leh William Lalnunfela te an lut a, Mizo tlangval pahnih hian danglamna an thlen thei bik lo. Covid-19 vangin inelna hi Goa-in a thleng a, stadium pathum Fatorda Stadium, GMC Athletic Stadium leh Tilak Maidan Stadium-ah inelna hi neih a ni dawn.

November 19, Zirtawpni
ATK Mohun Bagan 4 - 2 Kerala Blasters
ATK : Hugo Boumous 2', 39'; Roy Krishna 27' (P); Liston Colaco 50'
KER : Sahal Abdul Samad 24'; Jorge Pereyra Diaz 69'
November 20, Inrinni
Bengaluru 4 - 2 NorthEast United
BFC : Cleiton Silva 14'; Mashoor Shereef 22' (OG); Jayesh Rane 42'; Prince Ibara 82'
NEU : Deshorn Brown 17'; Mathias Coureur 25'
Zanin Inkhel Tur
East Bengal 7:30 PM Jamshedpur