Milan an tlawm ve ta

Serie A season bul ṭan fuh tak AC Milan chu tun season atan league bikah an tlawm ve ta. Goal sarih luhna inkhelah Milan hi Fiorentina lakah 4-3 in an chak lo a, striker Zlatan Ibrahimovic goal hnih khungin awmzia a nei lo.

Mualneitu Fiorentina tan Dusan Vlahovic-a'n goal hnih a khung bakah assist vawi khat a nei a, Alfred Duncan leh Riccardo Saponara ten goal khat ve ve an khung bawk - Milan lamin Ibra hmangin goal hnih an nei, an goal pakhat erawh Lorenzo Venuti-a'n anmahni lama a tih luh a ni.

Milan hian match 13 aṭangin point 32 hmuin table-ah pahnihna an la ni, hmahruaitu Napoli nen an point a in zat. Mahse, Naples club hian match khata an khelh tlem zawk avangin, an hmabakah an chak a nih chuan Milan hi an kalsan ang.

AC Milan coach Stefano Pioli chuan, "A bul kan ṭan fuh a, kan vanneih ṭum chu ni se 2-0 in hma kan hruai thei ang. Mahse, kan hun ṭha neih kan chhawr theih miau loh avangin a tawpah kan tuar. Goal kan phurh hnua kan beih let dan erawh a lawmawm, a rang thei ang bera insiam ṭhat kan tum ang," tiin a sawi.

Inkhel dangah Juventus chuan Lazio 2-0 a luhchhuahin an dinhmun an siamrem ve zel a, point 21 hmuin pasarihna dinhmun an luah ve leh ta. Old Lady tan hian defender Leonardo Bonucci chuan penalty vawi hnih a chhuih lut.