India-in series an la

India chuan Zirtawpni zan khan New Zealand chu wicket sarihin an hneh a, match thum khelh tura a hmasa berah hnehna an chan tawh bawk avangin series an la. Nizan khan Eden Gardens-ah match hnuhnung ber an khel a, result kan hre hman lo.

Ranchi-ah New Zealand-in bat hmasain over 20-ah 153/6 runs an siam. Mikhual team hi top order-a awm Martin Guptill (31), Daryl Mitchell (31), Mark Chapman (21), Glen Phillips (34) ten bul ṭan chhe lo mah se bottom order lamin an thlawp zawh loh avangin target an siam tam lo.

India tan captain Rohit Sharma (55) leh KL Rahul (65) te an che ṭha a, 50 runs an siam ve ve avangin over 17.2 lekah 155/3 runs siamin target hi an umpha. T20 series khelh zawh hian Men in Blue leh Black Caps te hian Test series an khel chhunzawm leh ang.