Covid-19 vanga Premier League sum hloh a tam
Coronavirus hri leng vanga Premier League club-ten sum an hloh tur zat chu pound tluklehdingawn khat a tling dawn a, financial services firm Deloitte-in a zirchianna thar ber aṭanga a lan danin an sum hloh tur zinga pound maktaduai 500 hi chu hloh hlen theih tur a ni.
Deloitte hian 2018-19 season-a Premier League sum chet vel dan chu a zir bawk a, he zirchianna aṭanga a lan danin nikuma English top flight club 20-te sum lakluh chu pound tluklehdingawn nga chuang a tling hem mai!
London-a hmunpui nei Deloitte chuan pound maktaduai 500 chu Premier League club-te hian broadcasting leh inkhel enna ticket an hralh ṭhin aṭanga an hloh tur a nih thu an sawi a, hei hi chu neih let theih tawh loa an hloh tur a ni.
Chutihrual chuan pound maktaduai 500 dang hi season an khelh zawh a, season tharah dan pangngai ang taka an kal theih bawk chuan neih let theih tura beisei a ni thung.
Premier League club zingah Manchester United chuan thla hmasa khan Covid-19 vanga pound maktaduai 28 an hloh tawh thu an sawi a, an sum hloh zat hi hei aia la sang zawk tura ngaih a ni bawk.
Zirchhuah langsar
• Premier League club-ten 2018-19 a sum an lakluh zat chu pound maktaduai 5.2 a tling a, a hma kum nena khaikhin chuan sum lakluh punna hi 7% a tling.
• Europe-a league lian panga England, Spain, Italy, Germany leh France-te chuan pound tluklehdingawn 15 lalutin hei hi record a ni a, a hma kum aṭanga teha a punna chu 9% a ni.
• Premier League club-te hlawkna belhkhawm chu pound maktaduai 824 a ni a, 5% in a tlahniam thung.
• Premier League leh Football League (PL hnuai lam zawng) club 92-te sum lakluh chu pound tluklehdingawn 6.2 a tling a, HMRC (Her Majesty's Revenue and Customs)-a chhiah an chhunluh zat chu pound tluklehdingawn 2.3 zet a tling!
• Chhiah pek hmaa Premier League club-te sum hloh zat chu pound maktaduai 165 a tling.
• Football League-a club 72-te sum lakluh chuan a vawi khat nan pound tluklehdingawn khat a tling.
• Championships club-te sum lakluh zat chu pound maktaduai 785 a tling a, 2017-18 season aṭanga tehin a punna hi 5% a ni.