Player thawn haw parukna Kalinic!
Croatia striker Nikola Kalinic chu World Cup khel turin Russia-ah kal ve mah se an ram lamah an thawn haw. Kalinic hi Nigeria nen an inkhelh ṭumin substitute bench-ah ṭhuttir niin, hun tawp dawn lamah coach Zlatko Dalic-a'n luhtir a tum a, a duh loh vangin thawn haw a ni.
Tun hma pawhin FIFA World Cup-ah hian player langsar tak tak pawh thawn haw ngai an lo awm tawh ṭhin a, an zingah hian Argentina legend Diego Maradona pawh a tel. Kumin World Cup aṭanga an hawtir Kalinic hi inelna tir lama an thawn haw leh buaina nei langsar player parukna chiah a ni nghal.
Mangṭha Kalinic
Kum 30 mi Kalinic hmun ruak hi hnawhkhah theih a ni tawh dawn lo a, Croatia chuan player 22 ni chungin tournament an hman tluan a ngai tawh dawn. AC Milan striker Kalinic hian chhuanlam atan a hnungzâng a nat thu a sawi, world champion vawi nga ni tawh Brazil nen friendly match an khelh
ṭum pawhin a buai phah tawh niin a sawi a ni.
Amaherawhchu, coach Zlatko Dalic-a'n ngaihdan dang a nei thung. Dalic chuan, "Ka player-te chu an fit bakah inkhel turin an inpeih tur a ni. Nigeria nen kan inkhelh lai khan Kalinic-a'n warming up a nei a, second half-ah lut tura ngaih a ni. Mahse, a hliam vangin inkhel tura a inpeih loh thu a sawi.
"Brazil nen England-a kan intawn ṭum khan hetiang thil hi a thleng tawh a, Pathiannia practice session kan neih hma pawhin a thleng tawh a ni. A nihna takah chuan dawhthei takin ka nghak a, a tawpah chuan hetiang thutlukna hi ka siam a ngai," tiin a sawi.
Croatia hian an match hmasa berah Nigeria chu 2-0 in an hneh a, an match pahnihna atan Ningani zan hian world champion vawi hnih ni tawh Argentina an hmachhawn leh dawn. Lionel Messi te ram lakah point an hmu thei a nih chuan knock out round lut turin an dinhmun a ṭha chho hle ang.
Willie Johnston (Scotland)
Scotland international Willie Johnston chu Argentina-in 1978 World Cup an thlen ṭum khan an ram aiawhin a kal ve a, mahse drugs test a paltlang zawh loh a vangin a tir lamah thawn haw leh nghal a ngai.
West Brom winger hi Archie Gemmill thlak nana an koh leh hnuhnawh a ni a, ram team a zawm hma hian khawsik damdawi a ei avangin a zun endik (urine test) a paltlang lo. Scottish Football Association chuan Peru nen an match hmasa ber an khelh hmain an hawtir leh daih a ni.
Roy Keane (Republic of Ireland)
2002 World Cup khel turin Republic of Ireland chuan Pacific island, Saipan-ah inbuatsaihna an nei. Manchester United midfielder Roy Keane chuan an ramin training an neihna hmun chu a fuh lo niin a hria, an hmanraw hman tur a thlen tlai bawk avangin a lungawi lo hle.
Mahni thu duh ve tak Keane hi player dangte hmaah coach Mick McCarthy nen an inhnial buai chiam a, hei vang hian World Cup match hmasa bera Cameroon hmachhawn tura inbuatsaih ai chuan a ui (Triggs) nen Cheshire-a lenkual a thlang ta zawk!
Diego Maradona (Argentina)
Diego Maradona-a'n 1986 World Cup-ah an ram a champion pui a, 1990-ah final khel leh phakin West Germany an hneh lo thung. Argentine legend hi 1994 khan USA-ah a inlan leh a, mahse damdawi hman phal loh a hmang tih hmuh chhuah a nih avangin thawn haw a ni.
Maradona hian inelna tir lam chu a hmachhawn hman a, match hnih khelin Greece 4-0 ngawta an sawp ṭum pawhin goal a khung. Mahse, he a mualphona hian a international career a ti tawp zui a, ropuina a lo chan tawhte pawh sawi hnawm phah nan an hman phah hial.
Nicolas Anelka (France)
France striker Anelka chu 2010 World Cup-ah khan Mexico 2-0 a an hneh loh ṭumin coach Raymond Domenech nen an inhnial buai a, Chelsea striker hlui hian ṭawngkam mawi lo takin a bei nia sawi a ni.
French Football Federation chuan Anelka hi South Africa aṭanga an thawn haw nghal bakah match 18 khel thei lo turin an hrem bui bawk. Anelka hian ram tana inkhelh a chawlhsan a ngaih zui phah a ni.
Zlatko Zahovic (Slovenia)
2002 World Cup-ah khan Roy Keane chauh kha buaina nei a ni bik lo, Slovenia playmaker Zahovic pawh coach Srecko Katanec nen an inhnial buai avangin thawn haw a ni a. Ani hi 2001 Champions League final khan Valencia tan khelin Bayern Munich lamah penalty a pet goal lo.
Benfica midfielder Zahovic hi Spain 3-1 a an hneh loh ṭumin thlak a ni a, a lungawi lo hle. Slovenia Football Federation chuan an player chungah hremna an lekkawh nghal a, khatih laia an president Rudi Zavrl chuan,"Zahovic khan a ze ngai chhuahin team boruak a tichhia a ni," a ti.