Red Bull leh Renault inṭhen dawn

Formula 1 team Red Bull leh an engine hman lai Renault te chu tun season tawp rual hian an inṭhen dawn a, Red Bull hian season hnih chhung atan Honda engine an hmang dawn ta zawk a ni.

Red Bull leh Renault te hi tun hnai kum 12 chhung an thawkdun tawh a, 2010 aṭanga 2013 chhung khan driver leh team championhsip-ah pakhatna niin, team dangin an el phak lo hle.

Mahse, 2014 aṭangin Formula 1-ah turbo hybrid engine hman a nih hnuah Renault hian beisei an phak lo - tun hnaiah Mercedes leh Ferrari te an tluk lo mai ni loin, an el phak lo hle a ni.

Red Bull team principal Christian Horner chuan, "Season hnih daih inremna kan nei thei hi a lawmawm hle. 2019-20 season aṭang chuan beiseina thar nen hmalam kan pan theih ngei ka ring," a ti. Honda siam engine hi junior team Toro Rosso in an hmang mek a, season tharah chuan team pahnih an chawm dawn.