Barcelona an champion thei ang em?

La Liga table chung berah Barcelona awm mah se Real Madrid-in point hnih leka an thlauh avangin ngaihngam taka awm thiam a harsa ang tih a chiang a, league hmahruaitu an ni chungin an khelh danah lawmna tur a vang hle bawk - heng zawng zawng hrilhfiahna awlsam ber chu January-a coach Ernesto Valverde an ban kha a ni. 

Barca hian tun season-ah khualmualah beisei an phak lo ṭhin a, inelna hrang hrangah khualmuala an zinchhuah aṭangin match 11-ah point an hloh tawh a, anni ang club tan chuan inenfiahna tur result tiin a sawi theih. 

Coach Valverde thlaktu Quique Setien hian sum harsatna avangin player a lei thei lo a, hliam vanga chawl mek Ousmane Dembele chhiar tel lohin Spanish coach hian senior player 18 bak chhawr tur a nei lo!

Covid-19 vanga fixture inhnaihzia ngaihtuah chuan Barca dinhmun a him lo tih loh rual a ni lo a, player pakhat lek inhliam pawhin team dinhmun tur thui takin a hril thei ang. 

Barcelona hian zanin dar 1:30-ah Real Mallorca lenchilhin bul an ṭan dawn a, hrem vangin Clement Lenglet a chhawr thei dawn lo - hliamin a tihbuai reng hnuah Samuel Umtiti lo kir tawh mah se ngai a la awh lo ang tih a chiang a, Setien-a tan Gerard Pique chu central defender zinga duhthlan tur awmchhun a ni. 

Setien atan duhthlan tur a tlem avangin kum 21 mi Ronald Araújo chu Pique nena inkawp tura a luhtir a a rinawm a, Uruguayan defender hi first team tana a inlan awmchhuna minute 14-naa hnawhchhuah a nih avangin rin ngam erawh a harsa. 

Barcelona ṭhatna ber erawh Lionel Messi an kawl avangin tlarhma a la ni reng a, league match 22-a goal 19 khungtu kawppui turin Luis Suarez a dam leh tawh bawk.

Liverpool striker hlui hi hliam vangin a season a tawp hmanah ngaih a ni a, mah se Covid-19 vanga inkhel tihtawp lailawk a nih zarah a lo kir leh thei ta. Catalan club tan chuna rimawi a tling. 

Barcelona hian Antoine Griezmann an la kawl tel cheu tih hriat a ṭha a, French forward hi Messi-a awm tak vangin Atletico Madrid angin Catalan club-ah a khaipa ber ni lo mah se a la thiam reng tih erawh theihnghilh loh a ṭha. 

Chutihrual chuan midfielder pathum Arthur, Ivan Rakitic leh Arturo Vidal te hi Spanish football transfer-a chanchin nei reng an ni a, an boruak hi chhiatpui tham a ni. 

Heng zawng zawng ngaihtuah chung hian Setien-a tan team enkawl a ngai dawn tih a chiang a, club tenau enkawl ṭhin kum 61 mi coach hian a career-a a vawi khat nan nomawi liantham a chawi thei ang em? Hunin a hril thuai dawn e.