A sang pali dinhmun inchuhna

Season thara La Liga khelh beisei zingah Atletico Madrid leh Valencia an la awm ve zel a, Atletico hian Pathianni zan dar 5:30-ah Athletic Bilbao lenchilhin bul an ṭan ve leh ang - May thla tawp lama training-naa inhliam Joao Felix chuan Atletico kawr a hak theih a la beiseiawm rih lo. 

Valencia hian nizan dar 1:30 khan Levante mikhualin bul an ṭan bawk a, he thu buatsaih a nih lai hian result kan hre hman lo. Nizana inkhel dangah  Getafe chuan Granada an lenchilh bawk a, hei pawh result hriat hman a ni lo. 

Getafe hi Champions League beisei zingah an tel pha a, anni hian tlarhnung chu an ṭhatna tih hrechiangin goal venhim chu thupuiah an nei a, an hlawhtlinpui hle. 

Barcelona boss Setien chuan, "An khelh dan hian ka thisen a ti lum a ni," tih hialin a sawi a, he ṭawngkam hian Getafe nihna thui takin a hrilhfiah - nizanah chak lo 'palh' ta pawh ni se Champions League beiseina a nung zel ang.

 

Pathianni zan dar 1:30-a inlan tur  Real Sociedad hi thaibo an harsa. European football-a naupang rual telna team hmuhnawm ber pawl tia sawi theih an ni hial a, playmaker Martin Odegaard thiam bikzia hi hmuhnawm 

a tling. 

Real aṭanga loan-a an hawh Odegaard bakah hian midfielder Mikel Merino, winger Mikel Oyarzabal leh Swedish striker Alexander Isak-te hi football mawina pho chhuak thei khawpa thiam vek an ni a, he team hi lo en bik deuh mah la tumahin an dem lo ang che.