Germany chungah pressure a awm

FIFA World Cup hnuhnung paliah champion lai pathum France, Italy leh Spain ten group stage an paltlang thei lo a, tun ṭumah hian 2014 champion Germany chu Russia rama an talbuai mek. Zanin dar 11:30 hian Germany leh Sweden te Fisht Olympic Stadium-ah an inkhel dawn a, Die Mannschaft hi an chak lo a nih chuan zanin la la hian an World Cup zinkawng tawp nghal theih dan a awm.

Group F inkhel pakhat zawkah Mexico leh South Korea te zanin dar 8:30 hian Rostov Arena-ah an inhmachhawn dawn a, El Tri-in match hmasa bera Joachim Low hote an hneh tawh avangin South Korea hi an hneh thei a nih chuan knockout stage an lut ang.

Hawna tur ticket?

Swedish journalist pakhat chuan Germany midfielder Sami Khedira hnenah 'hawna tur ticket siam chawp' squad pum daih an pe fiam a, kum 31 mi Juventus midfielder chuan, "July 16 hma chuan kan la mamawh lo ang," tiin nui pahin a chhang let. World Cup final khelh hun hi July 15 a ni a, Khedira hian champion a la inbeisei hle.

Brazil-a Germany-in nomawi an chawi ṭuma player pawimawh Khedira hi Mexico nen a khel ṭha lo a, tlarhnung a puih ṭhat loh avangin Mexico-in chance an ngah hle. Hei vang hian Germany international hlui Lothar Matthaus leh Stefan Effenberg te phei chuan bench-a ṭhuttir turin an ngaihdan an sawi hial.

Khedira chuan, "Sawiselna hi ka tan dawnsawn thiam loh tur a awm lo a, keipawhin ka khel ṭha lo tih ka hria. School naupang ang maia kan khelh kan bansan a ṭul a, fing zawkin team anga kan khelh a ngai a ni," tiin insiamṭhat an mamawh thu a sawi.

Thlan thiam a har

Germany-in Mexico an hneh loh ṭumin damlohna vangin Jonas Hector a inlan lo a, ram tana vawi 38 lut tawh ai hian Marvin Plattenhardt lutin ani erawh ram tan vawi sarih a inlanna chauh a ni. Hertha BSC left back Plattenhardt hi mawhphurtu ber ni lo mah se hming langsar lo ber a nih avangin Cologne ṭantuten 'Mr Reliable' tia an koh Hector-a hmun a ken a ṭul ang.

Joachim Low-a'n tlarhnung a rem dik a pawimawh dawn a, player a thlak a nih pawhin Hector bak tih danglam a awm a rinawm loh. Game siam tur bera ngaih Mesut Ozil-a'n beisei a pha lo a, chutichung chuan Arsenal midfielder hi khelhna hmun chang nawn thei a ni. Low-a hnuaiah Khedira-a'n hmun pawimawh a chang ṭhin a, Germany boss hian a thlak a nih chuan mipui lawm loh Ilkay Gundogan chu a thlaktu tur a ni.

Mexico lakah RB Leipzig striker Timo Werner a patuai deuh a, PSG midfielder Julian Draxler pawh eng ruai a ni lo. Heng player thlakna tur hian veteran striker Mario Gómez leh Borussia Dortmund forward Marco Reus te an awm.

Inkhelh dan tur

World Cup-a goal 10 khung tawh Thomas Muller chuan, "Sweden hian goal venghim tumin an khel dawn a, chuvangin kan chet ran a ṭul. Chutihrualin dawhtheihna kan tlachham a nih chuan min vaw let thei bawk," tiin ball chang tam tur zawk an nih thu a sawi.

Sweden lam hian Zlatan Ibrahimovic kawl tawh lo mah se an legend awm chung hian World Cup hnuhnung berah an tling thei lo a, tunah hian team angin an khel zawk. Janne Andersson hote hian kum 60 hnuah World Cup-a an match hmasa berah hnehna an chang leh chauh a, kum 2016 khan sports psychology advisor atan Daniel Ekvall lalutin ani hian an rilru put hmang a thlak nasa hle.

German club Rb Leipzig tana khel Sweden winger Emil Forsberg chuan, "Germany hi an rilru a huaisen a, vawi khat chak loh vanga buai tur an ni lo. Anni hneh tur chuan 110% kan rilru kan pek a ṭul a, kan vanneihna erawh an chungah hian pressure a awm. Keini tan chuan tlarhnung tih phui a, point hlawhchhuah a pawimawh," tiin goal an venhim tur thu a sawi ve bawk.