Brazil mawina Coutinho leh Neymar

Costa Rica laka hnehna chang turin Brazil-in minute 90 piahlam thleng an nghah ngai mah se hun pek belhah goal hnih an khung a, Costa Rica chu 2-0 in an hneh - last 16 lut turin an dinhmun a ṭha ta hle.

Brazil tan Philippe Coutinho leh Neymar ten goal khat ve ve an khung a, Selecao goal khung a tlai tawh avangin Costa Rica tan chhanletna hun a awm tawh lo - Coutinho tan tun World Cup-a a goal hnihna a ni a, Neymar tan a goal hmasa ber a ni thung.

Tite nauten point li an neih tak avangin last 16 lut turin an dinhmun a ṭha sawt a, Costa Rica erawh match hmasa berah 0-1 a Serbia an ngam tawh loh avangin World Cup an mangṭha a ṭul ta. Kum 2014 World Cup-a Uruguay, Italy leh England te nen group khata awm ho chunga quarterfinal lut thei team tan thil mak a thleng nawn tawh lo.

Nizana Serbia leh Switzerland inkhel result he thu buatsaih lai hian kan hre hman lo a, Serbia hian hnehna an chang a nih chuan last 16 an lut chiang tawh ang - he thuziak i chhiar meuh chuan a chiang tawh ang.

Danilo tel lohna

Brazil coach Tite-a'n Switzerland nena 1-1 a an inhnehtawk ang kha thlen nawn tir a tum lo a, hliam vanga inlan thei lo Danilo aiah Corinthians right-back Fagner a luhtir tih loh chu thlak danglam a nei lo.

Ṭum dang ang bawkin 4-3-3 formation hman a ni a, tlarhmaah Willian, Gabriel Jesus leh Neymar te an inkawp a, midfield pathumah Casemiro tih loh Paulinho leh Philippe Coutinho te pawh tlarhma lama goal khung tuma tlan nuam ti mi an ni.

Inkhel ṭantir aṭangin beisei lawk ang ngeiin Brazil-in goal-ah an nawr nghal a, Brazil goalkeeper Alisson Becker leh Costa Rica striker Marco Ureña hmel hmuh a khat a, Costa Rica keeper Keylor Navas hre ngai lo tan pawh Real Madrid si ban nghaktu hmel 'by heart'-na tham khawp a hmel kan hmu ngun thung.

Neymar leh VAR

Brazil-in Costa Rica nawr 'na' viau mah se an beisei ber goal an khung thei lo a, goal hmaah an vannei tawk lo. Tite-a'n chak zawh loh nawn a duh lo - Willian la chhuakin Douglas Costa a luhtir a, Paulinho aiah forward Roberto Firmino a luhtir bawk.

Samba Boys buaina erawh a ngai bawk a ni - player pahnihin goal an keng tel bik lo a, Costa Rica tlarhnung an ṭang tlat. Substitution siam fuh zawk nia lang chu Costa Rica an ni a, a vawi thum nana World Cup khel Christian Bolaños luh hnuah Brazil tlarhnung kan hmu ve ta zauh zauh.

Hun tawp nan minute 14 chiah a awm tawh a, Neymar chu penalty area-ah a tlu. Referee-in penalty spot kawk zet mah se a ngaihdan a thlak a, VAR hmangin Neymar tlukna an ennawn. Barcelona forward hlui hi Óscar Duarte nena ball an inchuhnaah a tlu nem hret niin referee-in a hmu a, penalty a cancel - VAR vanga World Cup a penalty hmu lo hmasa ber chu Neymar a ni!

Beiseina leh Brazil

An beisei penalty pek an nih loh hnuah pawh Brazil an talbuai lo. Champion tum team hian Costa Rica laka chak zawh loh an duh lo a, an nawr chhunzawm - Tite substitution fuhna a lang chho ṭan.

Hun pek belh a ni tawh - bench aṭanga luhtir Firmino-a'n Jesus tan ball a tauh thla a, Manchester City striker-in a duh angin ball hi thunun hman lo mah se a per lehlam chu Coutinho-a'n chiang zetin goal-ah a chantir.

A la tawp mai lo - Selecao-in hun pek belh ni tawh mah se Costa Rica an nawr chhunzawm a, Neymar a hun a inher chhuak. Brazil chhuanvawr hian bench aṭanga lut Costa siamsak 'duhthusam' chu goal-ah a chantir a, hun a tawp zui.