Argentina ngamtu Croatia an tlang

Pawi tih vangin Jorge Sam­paoli-a'n a lu a dawm vawng vawng a, captain Lionel Messi chuan ngaihtuah dang nei loin a melh ngai a melh reng bawk - Argentina player dangte chuan beidawn hmel takin an ngam loh Croatia player te hnehna lawma an lam lai an thlir.

Ningani zan inkhelah Ante Rebic, Luka Modric leh Ivan Rakitic te goal hmangin Croatia chuan Argentina 3-0 a sawpin World Cup last 16 an lut a, world champion vawi hnih ni tawh Argentina hmalam hun erawh a chiang ta lo. Nizan khan Nigeria leh Iceland an intawng a, inkhel result hian Croatia zui tur a hril thui dawn.

Goal thum

Argentina goalkeeper Willy Caballero-a'n awlsam taka ball pet chhuah tura ngaih a pet sual a, Chelsea si ban nghaktu hian winger Ante Rebic tana ball pet nuam tak turin a pet kang - Eintracht Frankfurt player hian harsatna nei loin minute 53-naah an goal hmahruai ni turin a pet lut.

Hun tawp hma minute 10 chauh awm tawhah Modric-a'n a thiamthil a lantir. Real Madrid midfielder hian box pawnah ball changin Manchester City defender Nicolas Otamendi hmaah chiai eih loa a thunun kual hnuah Caballero dan theih lohin mawi lutukin a pet kual lut. Goal thumna hi Barcelona midfielder Rakitic-a'n hnai tak aṭanga a khung a ni.

Croatia an thiam

Luka Modric awmna Croatia hian goal hmasa an khung hma pawhin Argentina tlarhnung an su nghing fo a, Inter Milan winger Ivan Perisic-a'n kawh zetin goal ban hrulah a pet chhuak a, Juventus striker Mario Mandzukic chuan hnai set sawt aṭangin a tauh ṭhelh bawk.

Modric leh a kawppui Rakitic ten midfield an thunun a, rang tak taka ball in pe kualin a hunah an keng thei bawk. Nigeria laka penalty chhuih luttu Modric hian Rebic tan through ball ṭha bik pawh a siamsak - uaithla lam tawh Javier Mascherano tan dan sen an ni lo.

Coach Zlatko Dalic-a'n tlar­hnung a remphui ṭhat bawk avangin match hnih an khelh tawhah goal nga khungin an la chhuah lo a, 1998 World Cup pathumna hi round sang zawkah an hmel kan hmu chho zel a nih pawhin thil mak a ni lo ang.

Thutlukna mak

Iceland an hneh zawh loh avangin Argentina tan chak ngei a pawimawh a, coach Sampaoli chuan team ṭha Croatia lakah thutlukna mak a siam thung. Juventus striker Gonzalo Higuain leh Pablo Dybala ten inkhel bul an ṭan lo chu a mak hran lo.

Mahse, Sevilla midfielder Ever Banega chu dam tawh chungin bench-ah ṭhut nawn tir a ni a, goal an mamawh hunah hian winger Angel di Maria tan hmun a awm loh laiin, ram tana tawnhriat la ngah lo Marcos Acuna leh Eduardo Salvio te tan hmun siamsak an ni leh thung si.

Goal khung turin tlarhma lamah Messi leh Man City striker Sergio Aguero te dahluh ni mah se, player pahnih chawm tur an ṭha tawk lo a, a bik takin mual sir aṭanga ball lalut tur leh chak taka ball tlan luhpui thei dah an ni lo - inkhel ṭan hma aṭangin coach Jorge Sampaoli thutlukna chuan sawi a hlawh hle.

Messi a nil!

Ni dang ang bawkin Argen­tina captain Messi chu mipui mit fukna a ni a, Barcelona thiampuipa hian midfielder Enzo Perez ball pek chu uiawm takin a pet hman lo a, hmun chep tak aṭanga a khung tur chu Catalan club tana a khelhpui Rakitic-a'n a dan sak bawk - Messi tana siamsaktu Perez hian 0-0 a nih laiin goal ruakah a khung bik lo.

Kum 30 mi Messi hian Iceland laka goal a zawng hmu thei lo ang bawkin Croatia hmaah pawh half chance chu nei ve mah se a khung thei lo. Barcelona tan chance awm lo aṭanga goal sual chhuak thei ṭhin hian Argentina tan 'Messi' a nihna a la lantir thei rih lo.

Inelna lian pathumah Argen­tina hian Messi captain-na hnuaiah final vawi thum an khel tawh a, nomawi khawih phak zuai ṭhin mah se a chawi lo zawkah an ṭang zel. Kum 31 tling mai tur tan a hun ṭha hnuhnung a ni thei tawh. Nigeria an hmachhawn hunah chuan tihsual pakhat pawh neih a thiang lo ang.