England tan chian hun
Pathianni tlai dar 5:30-ah England-in Panama an inkhelhpui dawn a, Three Lions hian hnehna an chang thei a nih chuan World Cup last 16-a an hmun a chiang tawhah a ngaih theih ang - an match hmasa berah Tunisia chu 2-1 in an hneh tawh.
Panama hian an match hmasa berah 0-3 ngawtin Belgium an ngam lo thung a, an lakah beiseina neih san a harsa. Mahse, Panama goalkeeper Jaime Penedo chuan an beiseina a la thih bik loh thu a sawi.
Romanian club Dinamo Bucharest goalkeeper Penedo chuan, "He hmunah hian inzir belha inelna hmachhawn turin kan lokal a, World Cup khelh zel kan duh chuan England lakah kan khelh ṭhat a ṭul a ni mai.
"Match hautak a ni dawn a, mahse kan hma hun engkim he inkhelah hian a innghah avangin theihtawp tak meuh meuh kan chhuah dawn a ni," a ti a, England tan hna a awlsam loh tur thu a sawi.
Ram tana beisei phak lo Raheem Sterling-a'n Panama lakah starting XI a chang dawn lo nia sawi a awm a, Manchester City forward hi a inlan lo a nih chuan Marcus Rashford chu a hmun ruaka lut tur a ni ang.
Hetihlai hian England pawhin Belgium laka an result avang ringawtin Panama ngaihnep an tum lo a, tharum hmang nasa team laka fimkhur turin coach Gareth Southgate-a'n naute Panama laka fimkhur turin a duh.
Liverpool midfielder Jordan Henderson chuan Southgate-a'n a fuih thu hi sawiin buaina an neih erawh a ring lo. Hendo chuan, "Premier League-ah tharum kan hmang nasa a, hetianga inkhelh hi kan team-in nuam kan tih chu a ni.
"Tunisia nena kan inkhelah pawh khan foul a tam em em a, tharum an hmang nasa em em bawk. Panama-ah a danglam dawn lo tih kan hria a, theihtawp an chhuah dawn a ni," tiin inven dan an zirlawk thu a sawi.