Group H Final Teranga Lions hliam turin Samurai Blue?

Group H-ah Japan, Senegal, Poland leh Colombia an awm a, team pali tan last 16 luhna kawng a la inhawng vek a, group stage-a World Cup mangṭha thei vek an ni bawk.

Japan leh Senegal-in point thum an hmu tawh a, Poland leh Colombia kut a la ruak thung. Pathianni zan dar 8:30-ah Japan leh Senegal an inkhel ang a, dar 11:30-ah Poland leh Colombia an inkhel thung ang.

Samurai Blue (Japan sawina) leh Teranga Lions (Senegal sawina) inkhelh huna chak zawk tan last 16 a chiang tawh tluk a ni ang a, Poland leh Colombia inkhela chak lo zawk tan knockout round luh beiseina a bo thung ang–a ngaihnawm dawn tih hian a hrilhfiah chiang ber.

Japan an ṭang!

Samurai Blue-in an match hmasa berah 2-1 in Colombia an hneh a, World Cup 2014-a 1-4 a an ngam loh team lakah phuba an la chiang hle–hriat tel atana ṭha erawh Colombia hian minute thumna aṭangin a kim loin an khel.

Japan-in World Cup-ah a vawi khat nana South American team hneha bul an ṭan avangin a ram pum phurin an phur a, Lal chhungkua aṭangin

Princess Takamado chuan nimin khan Japan team training a chhim hial.

Samurai Blue hi World Cup-a an squad chhah ber ṭum ang hiala chhal theih a ni a, a awih lo tan an match hmasa bera Colombia nena an inkhel kha thlirlet theih a ni.

Borussia Dortmund attacking midfielder Shinji Kagawa thlak turin AC Milan midfielder Keisuke Honda an luhtir thei a, Leicester City forward Shinji Okazaki bench-ah an dah a, Real Betis attacking midfielder Takashi Inui, Eintracht Frankfurt defensive midfielder Makoto Hasebe, Galatasaray defender Yuto Nagatomo leh Southampton defender Maya Yoshida te an nei bawk–Senegal hlau tur an ni lo.

Fak phu Senegal

Japan ṭhatzia kan sawi rualin Senegal team ṭhatna sawi hmaih theih a ni bik lo a, Teranga Lions hian an match hmasa bera Poland an hneh ṭumin an khel ṭha takzet.

Tlarhma lama Torino forward M'Baye Niang, Liverpool chhuanvawr Sadio Mané leh Stoke City forward Mame Biram Diouf-te tlan chakna chu Poland tlarhnung chelh loh a ni a, Japanese defender ten hna an ngah dawn.

Senegal squad-ah goalkeeper Khadim N'Diaye tih loh chu Europe-a khel vek an ni–anmahni ang thoa che rang Japanese player lakah tlarhnunga palian pahnih Napoli defender Kalidou Koulibaly leh Schalke defender Salif Sané te an pawimawh nawn ang–anni hi Robert Lewandowski dah niltu te kha an ni.

Hriat tel atana ṭha chu Senegal coach Aliou Cissé hi 2002 World Cup-a Senegal captain kha a ni a, quarterfinal hial a hruai thleng–player a nih laia a tih theih hi Portsmouth midfielder hlui hian coach a nih hnuah chhunzawm a duh ang.

Beisei nei Colombia

Colombia-in an match hmasa berah rinkai zawk nichungin Japan an ngam lo a, captain Radamel Falcao-a'n match hnih an la neih miau avangin beiseina sang tak an la neih thu a sawi.

Falcao chuan, "Match hnihin min la hmuak a, chumi awmzia chu beisei kan la nei thei tihna a ni. Kan kutah engkim a innghat a, he team hian a hunah huaisenna kan ngahzia kan pholang tawh ṭhin," tiin a beisei a bo lo.

Colombia hian an match hmasa berah hliam vangin James Rodriguez chu inkhel bul an ṭantir thei lo a, Bayern Munich forward hian Poland lakah erawh inkhel bul a ṭan theih tawh beisei a ni.

Poland assistant coach Hubert Malowiejski chuan, "James ṭhatzia kan hria a, ṭha taka a khelh loh nan hmun awl kan siamsak tur a ni lo. Hei hi kan tana chona inchhawp phurawm tak chu a ni," tiin James a hlau lo.

Final ang mai

Colombia captain Falcao-a'n Poland nena an inkhel tur pawimawh zia a hai lo a, final ang maia an khelh tur thu a sawi. Manchester United striker hlui chuan, "Final ang mai a ni dawn a, inkhel hmasaa kan tihsualna angah khan tihsual nawn a thiang tawh lo ang.

"He inkhela chak lo zawk tan World Cup-ah beisei tur a awm tawh dawn lo tih kan hria a ni," a ti a, knockout round lut tura hnehna chan ngei an tum thu a sawi.

Colombia tan hna erawh a awlsam dawn lo. Senegal laka Poland goal chhuah pahnih kan thlir let chuan tihsual 'palh' a ni tih a lang a, tihsual nawn an tum dawn lo.

Poland hi ram tana goal 55 khung tawh Robert Lewandowski, Napoli forward Arkadiusz Milik, Paris Saint-Germain midfielder Grzegorz Krychowiak leh Borussia Dortmund defender Lukasz Piszczek te awmna a nih avangin an insiamṭha thei ang tih a chiang.